اسلام آباد (پاکستان پوائنٹ نیوز13دسمبر 2018ء) وزيراعظم عمران خان سيڙپڪاري بورڊ جي چيئرمين کي هدايت ڪئي آهي ته ملڪ ۾ ڪاروبار ۾ آساني پيدا ڪرڻ جي لاءِ مختلف شعبن ۽ ان جي ذيلي شعبن ۾ درپيش سمورن مسئلن ۽ انهن جي حل جي باري ۾ جامع منصوبو پيش ڪري جڏهن ته اهو فيصلو ڪيو ويو آهي ته وزيراعظم ملڪ ۾ ڪاروبار ۾ آساني پيدا ڪرڻ جي باري ۾ هر مهيني جائزه اجلاس جي صدارت ڪندو. وزيراعظم خميس ڏينهن ڪاروبار ۾ آساني پيدا ڪرڻ ۽ مقامي ۽ غير ملڪي سيڙپڪارن جي لاءِ سازگار فضا پيدا ڪرڻ بابت اعليٰ سطح جي اجلاس جي صدارت ڪئي جنهن ۾ ناڻي واري وزير اسد عمر، قانون واري وزير ڊاڪٽر فروغ نسيم، وزيراعظم جي صلاحڪار عبدالرزاق، سيڙپڪاري بورڊ جي چيئرمين هارون شريف، وفاقي سيڪريٽرين ۽ سينئر عملدارن شرڪت ڪئي، سيڙپڪاري بورڊ جي چيئرمين هارون شريف وزيراعظم کي هيستائين کنيل قدمن جي باري ۾ آگاهه ڪندي ٻڌايو ته سيڙپڪاري بورڊ ڪاروباري ڏي وٺ ۾ سهولت پيدا ڪرڻ، سيڙپڪاري جي راهه ۾ ايندڙ رڪاوٽن کي ختم ڪرڻ ۽ ملڪ ۾ ڪاروبار کي خوش اسلوبي سان هلائڻ جي لاءِ تبديلي جي محرڪ طور ڪم ڪندو. سيڙپڪاري بورڊ جي چيئرمين وزيراعظم کي ٽيڪسيشن، ماليات تائين پهچ، ريگوليشن معاملا ۽ ڳاڙهي ربين سميت ڪاروباري برادري کي درپيش مختلف مسئلن جي باري ۾ آگاهه ڪيو، هن چيو ته سيڙپڪاري بورڊ خصوصي اقتصادي زونز جي قيام جي راهه ۾ ايندڙ رڪاوٽن کي ختم ڪرڻ جي لاءِ صوبن ۽ لاڳاپيل وزارتن سان گڏجي ڪم ڪري رهيو آهي، هن چيو ته نجي ۽ سرڪاري شعبي جي وچ ۾ رنڊڪ کي ختم ڪرڻ ۽ حڪومتي پاليسين تي نجي شعبي جي اعتماد جي بحالي ۽ ڪاروباري برادري جي سهولت جو حامل ڍانچو جوڙڻ جي لاءِ خصوصي ڪوششون آڻي رهيو آهي، سيڙپڪاري بورڊ جو چيئرمين وزيراعظم کي ”نئون پاڪستان ڊياسپورافنڊ“ جي باري ۾ آگاهه ڪيو جيڪو تعليم، صحت ۽ بنيادي ڍانچي جي ترقي جي اهم شعبن ۾ ايس ايم ايز ۽ ٻهراڙي جي ترقي جي فروغ جي لاءِ قائم ڪيو پيو وڃي، هن وزيراعظم کي سيڙپڪاري فريم ورڪ جي باري ۾ آگاهه ڪيو جيڪو يو اي اي، سعودي عرب، چين، جاپان ۽ ملائيشيا سان سيڙپڪاري کي متوجهه ڪرڻ ۽ عملي جامو پارائڻ جي لاءِ جوڙيو ويو آهي، اجلاس جي دوران فيصلو ڪيو ويو ويو ته وزيراعظم ملڪ ۾ ڪاروبار ۾ آساني پيدا ڪرڻ جي باري ۾ هر مهيني جائزي اجلاس جي صدارت ڪندو، وزيراعظم سيڙپڪاري بورڊ جي چيئرمين کي هدايت ڪئي ته مختلف شعبن ۽ ان جي ذيلي شعبن ۾ درپيش سمورن مسئلن ۽ ڪهڙي طرح ان ڏس ۾ حڪومت جي منظوري کي حاصل ڪرڻ، ٽيڪسيشن جا معاملا، تڪرارن جي حل ۽ سيڙپڪاري ۽ ڪاروباري برادري جي سهولت بابت طريقيڪار کي آسان بڻائي عمل کي سهي رخ تي هموار ڪري سگهجي ٿو، جي باري ۾ جامع منصوبو پيش ڪري.
وزيراعظم پاران سيڙپڪاري بورڊ جي چيئرمين کي جامع منصوبو پيش ڪرڻ جي هدايت
5 سال پھريان