پاڪستان ۽ ڀارت جي وچ ۾ ڳالهين کانسواءِ امن جو ڪو ٻيو رستو ناهي: شاهه محمود قريشي

اسلام آباد (پاکستان پوائنٹ نیوز10دسمبر 2018ء) پرڏيهي وزير شاهه محمود قريشي چيو آهي ته پاڪستان ۽ ڀارت جي وچ ۾ ڳالهين کانسواءِ امن جو ڪو ٻيو رستو ناهي، ڀارت عام چونڊن کانپوءِ اتي جيڪا به حڪومت اقتدار ۾ ايندي اسان کي اميد آهي ته اها ڀارتي طرز عمل تي نظرثاني ڪندي، پاڪستان افغانستان ۾ پائيدار امن جو خواهشمند آهي، اسان کي خطي جي ٻين ملڪن سان گڏجي افغانستان ۾ امن قائم ڪرڻ لاءِ سياسي حل ڳولڻو پوندو. سومر ڏينهن قومي اسيمبلي ۾ جمعيت علماءُ اسلام (ف) جي ميمبر مولانا واسع جي طرفان اٿاريل نقطن جي جواب ۾ شاهه محمود قريشي ان جي جواب ۾ چيو ته ان جو سياسي حل ڳولڻو پوندو، افغانستان ۾ ڊگهو امن قائم ڪرڻ اسان جي ضرورت آهي، ان لاءِ افغانستان ۾ مختلف ڌرين جي وچ ۾ ڳالهيون جي ذريعي ڳالهه اڳتي وڌائي ويندي، پاڪستان ان سڄي عمل کي اڳتي وڌائڻ چاهي ٿو، اسان افغانستان ۾ امن ۽ استحڪام جا خواهشمند آهيون، ان حوالي سان دوها ۽ يو اي اي ۾ ملاقاتون ٿي چڪيون آهن، تاجڪستان، ايران، چين سميت پاڙيسري ملڪن جي مدد گهربل هوندي. انهن سمورن ملڪن جي مدد سان اڳتي وڌنداسين، ان معاملي تي خوش قسمتي سان ڪنهن پارٽي اختلاف راءِ ظاهر ناهي ڪيو، ڪرتار پور لنگهه جي حوالي سان نقطي جو جواب ڏيندي شاهه محمود قريشي چيو ته هي مسئلو 1988ع کان 2018ع تائين ڊگهي عرصي کان غور هيٺ رهيو پر اڳڀرائي نه ٿي سگهي، هاڻي ان مسئلي تي اڳڀرائي ٿي جنهن جو سڄي دنيا ۾ موجود سک برادري آجيان ڪئي آهي، بي جي پي جي حڪومت نه چاهيندي به اسان جي ان قدم کي نه رڳو قبول ڪيو پر پنهنجا ٻه وزير به تقريب ۾ موڪليا، پاڪستان جي عالمي سطح تي ساک تي ان جا مثبت اثر پيا آهن، هن چيو ته ڀارتي اليڪشن کانپوءِ ڀارت جي جيڪا به حڪومت اقتدار ۾ آئي اها اسان سان پنهنجي رويي تي نظرثاني ڪندي، ڇو ته ڳالهين کانسواءِ امن جو ڪو ٻيو رستو ناهي، ان کان اڳ مولانا عبدالواسع چيو ته ملڪ ۾ دهشتگردي وڌي رهي آهي، دهشتگردي جي خلاف جنگ ۾ اسان جا هڪ لک جي لڳ ڀڳ فوجين ۽ سول ماڻهن جانين جا نذرانا پيش ڪيا ۽ اربين ڊالر جو نقصان ٿيو، ٽرمپ جي بيان تي حڪومت طرفان هي بيان ته اسان پرائي جنگ ۾ حصو نه وٺنداسين، وڏو خوش آئنده ۽ عوامي اميدن موجب آهي، پاڪستان جي ايتري وڏي جاني ۽ مالي نقصان سميت ڪرتار پور لنگهه کولڻ جي حوالي سان پرڏيهي پاليسي تي تفصيلي بحث ڪيو وڃي.