اسلامي ملڪن جي وچ ۾ واپار ۾ اضافو تمام ضروري آهي: صدر ممنون حسين

اسلام آباد (پاکستان نیوز پوائنٹ 23ستمبر 2016ء) صدر ممنون حسين چيو آهي ته اسلامي ملڪن جي وچ ۾ واپار ۾ اضافو تمام ضروري آهي، او آءِ سي جا ميمبر ملڪ پنهنجون ضرورتون اسلامي ملڪن جي مصنوعات مان پوريون ڪن، پاڪستان ۽ مراڪش جي وچ ۾ گڏيل واپار صلاحيت کان گهٽ آهي جنهن کي وڌائڻ جي ضرورت آهي. هن اها ڳالهه جمعي ڏينهن مراڪش جي عهدو ڇڏيندڙ سفير مصطفيٰ صلاح الدين سان ايوان صدر ۾ ملاقات دوران چئي. صدر چيو ته واپار ۾ اضافي جي لاءِ پاڪستان ۽ مراڪش جي وچ ۾ غير ضروري ٽيڪسن جو خاتمو ٿيڻ گهرجي ته جيئن واپاري سرگرميون وڌن ۽ ٻئي قومون هڪٻئي جي وڌيڪ ويجهو اچي سگهن. صدر چيو ته پاڪستان ۾ سيڙپڪاري جي لاءِ ماحول سازگار آهي جنهن جو فائدو مراڪش جي سيڙپڪارن کي کڻڻ گهرجي. هن چيو ته پاڪستان ۽ مراڪش جي وچ ۾ تعليم، ثقافت ۽ ٻين شعبن ۾ وفدن جي مٽاسٽا ۾ اضافو ٿيڻ گهرجي. صدر چيو ته مراڪش جي عوام پنهنجي خطي ۾ پنهنجي بهترين طرز عمل سبب تمام گهڻي مشهور آهي، هن مراڪش جي وزيراعظم عبدالله بين ڪيرين جي قيادت ۾ مراڪش جي ترقي ۽ خوشحالي طرف سفر جي به واکاڻ ڪئي. صدر مراڪش جي قيادت ۽ عوام جي لاءِ نيڪ خواهشن جو اظهار ڪيو. ان موقعي تي عهدو ڇڏيندڙ مراڪش جي سفير پاڪستاني حڪومت جو علائقائي ۽ عالمي معاملن ۾ مراڪش جي حمايت تي ٿورو ادا ڪيو.