پاڪ چين لاڳاپا سياسي کان اقتصادي نوعيت جي رابطن جي صورت ۾ هڪ مختلف مرحلي ۾ داخل ٿي چڪا آهن: وزيراعظم محمد نواز شريف

نيويارڪ (پاکستان نیوز پوائنٹ 21ستمبر 2016ء) وزيراعظم محمد نواز شريف چيو آهي ته پاڪ چين لاڳاپا سياسي کان اقتصادي نوعيت جي رابطن جي صورت ۾ هڪ مختلف مرحلي ۾ داخل ٿي چڪا آهن جيڪا پاڪستان جي لاءِ انتهائي خوشي جي ڳالهه آهي جڏهن ته چيني وزيراعظم چٽن لفظن ۾ چيو آهي ته چين پاڪستان سان گڏ بيٺل هوندو ۽ هر فورم تي پاڪستان جي لاءِ آواز اٿاريندو، اسان ڪشمير بابت پاڪستان جي موقف کي انتهائي اهميت ڏيون ٿا، اميد آهي ته عالمي برادري ڪشمير بابت پاڪستان جي موقف کي بهتر طور سمجهندي، اسان پاڪستان ۽ ڀارت جي وچ ۾ لاڳاپن ۾ بهتري ۾ تعميري ڪردار ادا ڪرڻ جي لاءِ تيار آهيون. ٻنهي اڳواڻن اهڙن خيالن جو اظهار گڏيل قومن جي جنرل اسيمبلي جي 71 هين اجلاس جي موقعي تي ڪالهه اربع ڏينهن هتي ملاقات دوران ڪيو. وزيراعظم جي پرڏيهي معاملن واري صلاحڪار سرتاج عزيز، وزيراعظم جي پرڏيهي معاملن وارو خصوصي معاون طارق فاطمي ۽ پرڏيهي سيڪريٽري اعزاز احمد چوڌري ۽ ٻين وزيراعظم جي مدد ڪئي. ٻنهي اڳواڻن پاڪستان ۽ چين پاران پنهنجي عوام ۽ خطي جي لاءِ امن ۽ ترقي جي گڏيل ويزن تي ٻڌل گهرن رابطن جي لاءِ ڪوششن تي اطمينان جو اظهار ڪيو. ان موقعي تي چيني وزيراعظم لي ڪي چيانگ چيو ته چين پاڪستان سان گڏ بيٺل هوندو، اسان پاڪستان جي حمايت ڪريون ٿا ۽ اسان هر فورم تي پاڪستان جي لاءِ آواز اٿارينداسين. اسان پاڪستان ۾ چيني اهلڪارن جي تحفظ ۽ سلامتي جي لاءِ وڌيڪ وسيلن جي سيڙپڪاري ڪرڻ تي وزيراعظم محمد نواز شريف جا ٿورائتا آهيون. هن چيو ته اسان ڪشمير بابت پاڪستان جي موقف کي انتهائي اهميت ڏيون ٿا. چيني وزيراعظم چيو ته پاڪستان دهشتگردي جو پاڻ شڪار آهي، اسان اميد ڪريون ٿا ته پاڪستان ۽ ڀارت جي وچ ۾ صورتحال ڇڪتاڻ واري نه ٿيندي. چيني وزيراعظم چيو ته اسان اها به اميد ڪريون ٿا ته عالمي برادري ڪشمير بابت پاڪستان جي موقف کي بهتر طور تي سمجهندي. هن چيو ته اسان پاڪستان ۽ ڀارت جي وچ ۾ لاڳاپن ۾ بهتري ۾ تعميري ڪردار ادا ڪرڻ جي لاءِ تيار آهيون. وزيراعظم محمد نواز شريف پاڪ چين لاڳاپن تي اطمينان جو اظهار ڪندي والاريل ڄمون ۽ ڪشمير ۾ ڪيل ظلمن تي چين جي بيان جي آجيان ڪئي. وزيراعظم نواز شريف چيو ته پاڪستان علائقائي امن ۽ استحڪام جي لاءِ پرعزم آهي، اسان هر قسم جي دهشتگردي جي مذمت ڪريون ٿا. وزيراعظم چيو ته آپريشن ضرب عضب ڪاميابي سان جاري آهي، اسان پاڪستان مان دهشتگردن جي نيٽ ورڪ کي تباهه ڪيو آهي. هن چيو ته پاڙيسرين سان امن اسان جي ويزن جو حصو آهي. وزيراعظم نواز شريف تازي ٻوڏ سبب چين ۾ ٿيندڙ جاني نقصان تي چيني هم منصب سان تعزيت ڪئي. هن چيو ته چين ۾ پيش ايندڙ افسوسناڪ واقعا اسان جي لاءِ ڳڻتي جو سبب هوندا آهن. پاڪستان ۽ چين پاڻ ۾ ڀائر آهن. هن چيو ته پاڪ چين لاڳاپا سياسي کان اقتصادي نوعيت جي مختلف مرحلي ۾ داخل ٿي چڪا آهن جيڪا پاڪستان جي لاءِ تمام گهڻي خوشي جي ڳالهه آهي. جڏهن ته چيني وزيراعظم لي ڪي چيانگ وزيراعظم نواز شريف لاءِ خيرسگالي جي جذبن جو اظهار ڪيو. چيني وزيراعظم چيو ته پاڪ چين لاڳاپا اڻٽٽ آهن. هن وزيراعظم محمد نواز شريف پاران جلد پاڪستان جو دورو ڪرڻ جي دعوت قبول ڪري ورتي.