موجوده حڪومت محدود وسيلن جي باوجود مسئلن تي ضابطو آڻي ورتو آهي: وزيراعظم شاهد خاقان عباسي

اسلام آباد/لاهور (پاکستان نیوزپوائنٹ 24مارچ2018ء) وزيراعظم شاهد خاقان عباسي چيو آهي ته موجوده حڪومت محدود وسيلن جي باوجود مسئلن تي ضابطو آڻي ورتو آهي، ايندڙ 15 سالن لاءِ بجلي جي ضرورتن موجب پيداواري منصوبا مڪمل ڪيا آهن، بيروزگاري جي خاتمي ۾ صنعت جو ڪردار بنيادي اهميت رکندڙ آهي، صنعتڪارن کي سهولتن جي فراهمي حڪومت جي ذميداري آهي، سي سي وي ڪيبل جي پهرين جديد ترين پلانٽ کان بجلي جي پيداواري خرچن ۽ ترسيل جي نقصانن کي گهٽ ڪرڻ ۾ مدد ملندي، فاسٽ ڪيبل جو هي وڏو اهم منصوبو بجلي جي چوري ۽ ٽيڪنيڪل نقصانن کي گهٽ ڪرڻ ۾ مددگار ثابت ٿيندو، اربين روپين جي سيڙپڪاري سان روزگار جا نوان موقعا پيدا ٿيڻ سان گڏوگڏ مختلف ٽيڪسز جي مد ۾ به وصوليون ٿينديون، صنعتي ترقي لاءِ پاليسين جو تسلسل ۽ استحڪام ضروري آهي، بجلي پيدا ڪرڻ لاءِ متبادل توانائي جي ذريعن مان فائدي جي حوالي سان منصوبن تي عمل جاري آهي، حڪومت کي پاڻ ڪاروبار ناهي ڪرڻو پر صنعتڪارن کي سهولتون فراهم ڪرڻيون آهن. ڇنڇر ڏينهن سندر انڊسٽريل اسٽيٽ لاهور ۾ فاسٽ ڪيبل طرفان ملڪ جي پهرين سي سي وي لائين ۽ ايلومينيم لائي مينوفيڪچرنگ پلانٽ جي افتتاح جي موقعي تي تقريب کي خطاب ڪندي هن چيو ته فاسٽ ڪيبل طرفان سي سي وي ڪيبل جي پهرين جديد ترين پلانٽ جو افتتاح خوش آئنده آهي جنهن سان بجلي جي پيداواري خرچن ۽ ترسيل جي نقصانن کي گهٽ ڪرڻ ۾ مدد ملندي. هن چيو ته فاسٽ ڪيبل جو هي منصوبو گهڻو اهم آهي جيڪو بجلي جي چوري ۽ ٽيڪينڪل نقصانن کي گهٽ ڪرڻ ۾ مددگار ثابت ٿيندو، هن چيو ته پئسا ڪمائڻ جا ڪيترائي طريقا آهن پر صنعت لڳائي منافعو حاصل ڪرڻ هڪ مشڪل طريقو آهي جڏهن ته ٻين ذريعن ۾ نقصانن جا خدشا گهٽ ۽ منافعي جي شرح وڌيڪ هوندي آهي، تنهن هوندي به ملڪ جو فائدو انهي ۾ آهي ته وڌ کان وڌ صنعتون لڳايون وڃن جنهن سان حڪومت کي ٽيڪسز جي مد ۾ آمدني کانسواءِ روزگار جي فراهمي کي به يقيني بڻائي سگهجي ٿو، هن چيو ته صنعتڪارن جو ڪردار قومي معيشت جي ترقي لاءِ انتهائي اهم آهي ۽ ان طرح جي جديد صنعتن جي قيام سان ملڪي ترقي جي لاءِ اهم ڪردار ادا ڪيو پيو وڃي ۽ ڪو به ان کان انڪار نٿو ڪري سگهجي، هن چيو ته حڪومت صنعتي ترقي جي فروغ لاءِ سهولتن جي فراهمي کي يقيني بنائيندي. وزيراعظم چيو ته بدقسمتي سان حڪومتون گهٽ کان گهٽ وقت ۾ وڌ کان وڌ ٽيڪسز وصول ڪرڻ چاهين ٿيون جنهن سان صنعتڪار برادري تي دٻاءُ ۾ اضافو ٿيندو آهي تنهن هوندي به مسلم ليگ (ن) جي موجوده حڪومت وسيلن ۽ آمدني ۾ اضافي جي حوالي سان وچولي مدي ۽ ڊگهي مدي واريون پاليسيون جوڙيون آهن ته جيئن صنعت کي ترقي ٿي سگهي ۽ اسان جي ڪوشش آهي ته پاليسي سازي جي عمل کي وڌيڪ مستحڪم ڪيو وڃي ته جيئن پاليسي ۾ ڪيل واعدن موجب توهان کي سهولتون ملي سگهن. هن چيو ته سڀ کان بنيادي شيءَ پاليسين جو استحڪام آهي ۽ اسان کي ان حوالي سان ڪافي حد تائين ڪاميابي حاصل ٿي آهي، هن چيو ته پاليسين کي سياسي تبديلين جي سبب نه بدلائڻ گهرجي ته جيئن پاليسين جو تسلسل جاري رهي سگهي، هن چيو ته ملڪ ۾ قيادت جي تبديلي جو فيصلو عوام جي ووٽ سان ٿيندو ۽ عوام جي فيصلي موجب حڪومت ٺهندي پر قومي ترقي لاءِ جوڙيل پاليسيون قائم رهنديون ۽ ان تي عملدرآمد جاري رهندو. هن چيو ته صنعتي ترقي جي عمل کي جاري رکڻ لاءِ سمورن حصيدارن جي مشاورت سان پاليسي سازي ڪئي پئي وڃي، هن چيو ته فاسٽ ڪيبلز طرفان اربين روپين جي سيڙپڪاري سان نه رڳو روزگار جا نوان موقعا پيدا ٿيندا پر حڪومت کي مختلف ٽيڪسز جي مد ۾ به وصوليون ٿينديون، وزيراعظم چيو ته جيڪڏهن قومي صنعت ترقي ڪندي ته ملڪ به ترقي ڪندو. هن صنعتي ترقي جي ملڪي درآمدات ۾ گهٽتائي ۽ فاسٽ ڪيبلز طرفان لڳايل جديد ترين پلانٽ بجلي جي ورڇ ڪندڙ ڪمپنين کي معياري مصنوعات جي فراهمي کي يقيني بڻائيندو. وزيراعظم چيو ته صنعتي ترقي جي نتيجي ۾ هر سطح تي حڪومت کي فائدو ٿيندو، هن فاسٽ ڪيبلز جي انتظاميه جو ٿورو ادا ڪندي ان يقين جو اظهار ڪيو ته ان جي مصنوعات عالمي معيار موجب هوندي جڏهن ته اسان جي ٻين صنعتن کي به معياري مصنوعات جي تياري تي خصوصي ڌيان ڏيڻ گهرجي، وزيراعظم چيو ته ماضي جي دورن ۾ صرف ڪم هلائڻ لاءِ مصنوعات تيار ڪئي ويندي هئي پر هاڻي ڪارڪردگي ۽ معيار تي پورو ڌيان ڏنو پيو وڃي، هن اميد جو اظهار ڪوي ته فاسٽ ڪيبلز جي طرح ٻيا صنعتي ادارا به عالمي معيار موجب ڪم ڪندا ۽ معياري مصنوعات جي تياري کي يقيني بڻائيندا. هن چيو ته دنيا گلوبل وليج بڻجي چڪي آهي ان لاءِ اسان تي به عالمي سطح تي انهن معيارن جا اصول لاڳو ٿيندا آهن جيڪي ٻين ملڪن تي لاڳو آهن، هن چيو ته معيار جي لاءِ رهنما اصولن تي عمل سان ئي عالمي منڊين ۾ ٻين برآمد ڪندڙن جو مقابلو ڪري سگهجي ٿو. وزيراعظم چيو ته موجوده دور ۾ آزاداڻي واپار جي معاهدن جي حوالي سان مشڪلاتون آهن ڇو ته اسان جي صنعت کي معياري مصنوعات جي تياري ۾ مشڪل درپيش آهي، هن اميد ظاهر ڪئي ته صنعتي ترقي ۽ مصنوعات جي معيار ۾ بهتري سان ملڪي روانگي واپار وڌندو. وزيراعظم چيو ته پاڪستان 200 ملين کان وڌيڪ ماڻهن جي مارڪيٽ آهي ۽ عالمي سطح تي بهتر مقابلي جي ذريعي اسان پنهنجي مصنوعات لاءِ وڏين منڊين تائين رسائي حاصل ڪري سگهون ٿا. هن چيو ته حڪومت چاهي ٿي ته توهان کي موقعا فراهم ڪيا وڃن ته جيئن توهان برآمدات کي فروغ ڏئي سگهو جنهن لاءِ معياري مصنوعات جي تياري تي خصوصي ڌيان ڏيڻو پوندو، هن چيو ته حڪومت بجلي، گئس ۽ بنيادي ڍانچي جي کوٽ جي مسئلن کي پورو ڪري ڇڏيو آهي ۽ هاڻي ڪاروباري خرچن ۾ گهٽتائي آڻڻ لاءِ قدم کنيا پيا وڃن. وزيراعظم چيو ته جيڪڏهن نجي شعبو ۽ حڪومت گڏجي ڪم ڪن ته ان سان بهتر نتيجا ملي سگهن ٿا. هن چيو ته صنعتي ترقي ۽ معياري مصنوعات جي تياري سان خرچن کي به گهٽ ڪري سگهجي ٿو. هن چيو ته ٽيڪسز جي نظام ۾ بهتري جي ضرورت آهي ۽ ان تي ڪم ڪيو پيو وڃي، حڪومت ڊگهي ۽ وچولي مدي کي متوازن رکڻ لاءِ پاليسي جوڙيندي آهي تنهن هوندي به ان حوالي سان کنيل قدمن جا نتيجا ظاهر ٿيڻ ۾ ڪجهه وقت گهربل هوندو آهي، هن چيو ته قومي معيشت جي واڌ جي شرح 5.6 سيڪڙو کان وڌي چڪي آهي ۽ ايندڙ مالي سال جي دوران هي 6 سيڪڙو کان وڌيڪ هوندي جنهن سان ملڪ ۾ سيڙپڪاري ايندي ۽ صنعتي ترقي جي فروغ سان برآمدات ۾ اضافو ٿيندو، هن چيو ته حڪومت ۽ صنعتڪارن جي گڏيل تعاون سان برآمدات وڌيندي. وزيراعظم چيو ته ڪنهن به معيشت جي ترقي سان حڪومتي وسيلن ۾ اضافو ٿيندو آهي جنهن سان ملڪ ترقي ڪندو آهي. هن نجي شعبي تي زور ڏنو ته ملڪ ۾ سيڙپڪاري جي فروغ لاءِ پنهنجو ڪردار ادا ڪري. وزيراعظم چيو ته حڪومت ايندڙ بجيٽ ۾ صنعتڪارن ۽ ڪاروباري طبقي لاءِ ٽيڪس مراعتون متعارف ڪرائيندي. هن چيو ته سي سي وي ڪيبلز جي جديد ترين پلانٽ لڳائڻ لاءِ فاسٽ ڪيبلز جي انتظاميه جون ڪوششون نمايان آهن. وزيراعظم چيو ته مون 20 سالن کانپوءِ سندر انڊسٽريل اسٽيٽ آيو آهيان ۽ ان صنعتي زون ۾ عالمي معيار جي سهولتن جي فراهمي تي خوشي آهي. هن چيو ته ڪنهن به صنعتي زون ۾ سهولتن جي دستيابي کان متاثر ٿي غير ملڪي سيڙپڪاري ڪري ٿو، هن ان اميد جو اظهار ڪيو ته صنعتي زون به ترقي ڪندو. هن ان ڳالهه جو به خاص طور تي ذڪر ڪيو ته 1999ع ۾ جڏهن مارشل لا لڳو ته محمد نواز شريف تي هڪ ڪيس سندر صنعتي زون جي قيام جو به بڻايو ويو هو، هن چيو ته جيڪو شخص ڪم ڪري ٿو ان کي ڪيسن کي منهن ڏيڻو پوندو آهي جڏهن ته ڪم نه ڪندڙن کي انعامن سان نوازيو ويندو آهي، هن چيو ته اسان کي ڪم ڪندڙن کي عزت ڏيڻ گهرجي ۽ ملڪ ۾ ان ڪلچر کي فروغ ڏيڻ جي ضرورت آهي، وزيراعظم چيو ته ملڪ جا مسئلا اڄ پيدا ناهن ٿيا پر هي گذريل 15 سالن جا مسئلا آهن ۽ وقت گذرڻ سان گڏوگڏ ان ۾ اضافو ٿيندو رهيو آهي، هن چيو ته اسان جي حڪومت مشڪل حالتن جي باوجود ڪيترائي وڏا ترقياتي منصوبا مڪمل ڪيا آهن جنهن جو مثال نٿو ملي، هن چيو ته آمريڪا، برطانيه ۽ فرانس جهڙا وڏا ملڪ به ايتري وڏي موٽر ويز ۽ هاءِ ويز نٿا ٺاهي سگهن جيتري پاڪستان ۾ ٺاهي ويو آهي ۽ اسان هي سڄو ڪم پنهنجي وسيلن مان ڪري رهيا آهيون، وزيراعظم چيو ته جولاءِ جي ايندڙ هفتي ۾ عوام ڪارڪردگي جي بنياد تي فيصلو ڪرڻو آهي جنهن جي نتيجي ۾ آگسٽ ۾ نئين حڪومت قائم ٿيندي ۽ قومي ترقي جو سفر جاري رهندو، هن ان عزم جو به ورجاءُ ڪيو ته ملڪ ۾ جمهوريت جو تسلسل جاري رهندو ۽ عوام ئي پنهنجي ووٽ جي طاقت سان آئنده سياسي قيادت جو فيصلو ڪندي.