پارلياماني پريس گئلري مان صحافين جو واڪ آئوٽ

اسلام آباد (پاکستان نیوزپوائنٹ 16مارچ2018ء) پارلياماني پريس گئلري مان سينئر صحافي مطيع الله جان سان خاتون محتسب ڪشمالا طارق جي مبينه ناروا سلوڪ ۽ پنڊي ۾ ميٽرو واچ جي آفيس ۾ ڀڃ ڊاهه ۽ عملي تي تشدد جي خلاف صحافين واڪ آئوٽ ڪيو، جمعي تي قومي اسيمبلي جي اجلاس جي ڪارروائي جاري هئي ته صحافين گئلري مان واڪ آئوٽ ڪيو، پيپلزپارٽي جي ميمبر اعجاز جکراڻي اعتراض واري نقطي تي صحافين جي واڪ آئوٽ جي نشاندهي ڪئي جنهن تي ڊپٽي اسپيڪر مرتضيٰ جاويد عباسي وفاقي وزير رانا تنوير حسين، مذهبي معاملن واري مملڪتي وزير پير امين الحسنات شاهه ۽ پير محمد اسلم بودلا کي هدايت ڪئي ته هو پريس گئلري وڃي صحافين سان ڳالهه ٻولهه ڪن، ڊپٽي اسپيڪر جي هدايت تي رانا تنوير حسين، پير امين الحسنات شاهه ۽ پير محمد اسلم بودلا پريس گئلري آيا، اتي سينئر صحافي مطيع الله جان ٻڌايو ته خاتون محتسب ڪشمالا طارق کان باقاعدي وقت وٺي ان جي آفيس وڃي ان جو انٽرويو رڪارڊ ڪيو، بعد ۾ ڪشمالا طارق مون کي ۽ منهنجي عملي کي پنهنجي آفيس ۾ بند ڪري ڇڏيو ۽ زور ڀريو ته ان جي انٽرويو جي ٽيپ ان جي حوالي ڪئي وڃي، تقريبن ڏيڍ ڪلاڪ بند رکيو، اسان به ۽ انهن به پوليس گهرائي ورتي، اسان حراست ۾ رکڻ جي ايف آءِ آر داخل ڪرائڻ جي ڪوشش ڪئي پر پوليس اسان جي ڳالهه نه ٻڌي رهي آهي، ميٽرو واچ جي ايڊيٽر زاهد فاروق ملڪ ٻڌايو ته ان جعلي ڊگريون ٺاهڻ جي هڪ گروهه جي خلاف خبر ڏني جنهن کانپوءِ انهن ماڻهن اسان جي آفيس اچي عملي کي هراسان ڪيو ۽ آفيس ۾ ڀڃ ڊاهه ڪئي، رانا تنوير حسين صحافين کي درخواست ڪئي ته هو پريس گئلري واپس اچي وڃن، هو ايوان ۾ واپس وڃي ڳالهه ڪندو، ميٽرو واچ تي حملي جي حوالي سان پنجاب پوليس کي هدايت ڪئي ويندي ته جلدکان جلد ان مسئلي کي حل ڪيو وڃي، جڏهن ته مطيع الله جان جي معاملي تي به گهرو وزرات کي خصوصي هدايت ڪئي ويندي، صحافين جو مطالبو هو ته صحافين جي واڪ آئوٽ کانپوءِ انهن پاران ڪيل معاملن تي نشاندهي جي فالو اپ جي لاءِ پارلياماني ڪميٽي قائم ڪئي وڃي، بعد ۾ رانا تنوير حسين ايوان کي مطيع الله جان سان پيش آيل واقعي تي تفصيلن کان آگاهه ڪيو، هن ٻڌايو ته زاهد فاروق ملڪ جي معاملي تي پنجاب پوليس رپورٽ داخل ڪئي آهي، هو چاهين ٿا ته قومي اسيمبلي سيڪريٽريٽ ان سلسلي ۾ پنهنجو ڪردار ادا ڪري، رانا تنوير حسين چيو ته هن هائوس هڪ ڪميٽي جوڙي هئي جنهن اهڙن واقعن کي ٽيڪ اپ ڪرڻو هو، اها ڪميٽي فعال نه آهي ته ان کي ٻيهر نئين سري سان جوڙيو وڃي، صحافين سان زيادتين جو ازالو ٿيڻ گهرجي، ڊپٽي اسپيڪر چيو ته صحافين جي خدشن تي سيشن کانپوءِ هو صحافين جي نمائندن ۽ لاڳاپيل عملدارن سان گڏجاڻي ڪندو، ان خاطري تي صحافين پريس گئلري جو واڪ آئوٽ ختم ڪري ڇڏيو.