هاڻي هار جيت جو مرحلو گذري ويو آهي، اڳتي وڌڻ جي ضرورت آهي: سيد نويد قمر

اسلام آباد (پاکستان نیوزپوائنٹ 13مارچ2018ء) پاڪستان پيپلزپارٽي جي پارليماني اڳواڻ سيد نويد قمر پختونخوا ملي عوامي پارٽي جي سربراهه محمود خان اچڪزئي جي جمهوريت جي لاءِ خدمتن کي ساراهيندي چيو آهي ته هاڻي هار جيت جو مرحلو گذري ويو آهي، اڳتي وڌڻ جي ضرورت آهي، ڇا وڃايو ڇا حاصل ڪيو ان مان اسان کي سبق حاصل ڪرڻ گهرجي، ايندڙ عام چونڊون صاف، شفاف ، منصفاڻيون ۽ مداخلت کان پاڪ هجن اها ئي جمهوريت جي اصل فتح هوندي، اڱاري ڏينهن قومي اسيمبلي ۾ اعتراض واري نقطي تي سيد نويد قمر محمود خان اچڪزئي جي ڪردار کي ساراهيندي چيو ته سينيٽ چيئرمين ۽ ڊپٽي چيئرمين جي چونڊن جي حوالي سان ڪجهه خلا ضرور آهن پر ڪالهوڪي فيصلي ۾ پاڪستان تحريڪ انصاف، پيپلزپارٽي ۽ ايم ڪيو ايم گڏجي حڪومت جي مخالف اميدوار کي ووٽ ڏنو، اهو آئين ۽ قانون جي خلاف نه آهي، هن چيو ته حڪومت جيڪڏهن پهرين ڏينهن کان پارليامينٽ کي اهميت ڏي ها ته شايد هي ڏينهن نه ڏسڻا پون ها، وقت اچڻ تي اسان جمهوري بڻجي ويندا آهيون، هتي جيڪو ڪجهه به ٿيو سڀ اسان کي اکين سامهون ٿيندو رهيو، سياسي پارٽين جي وچ ۾ وڇوٽيون ان لاءِ وڌيون آهن ته نظام کي اڳتي وڌائڻ جي لاءِ اسان جون ڪوششون مفيد ثابت ناهن ٿيون، ميان رضا رباني جو چيئرمين طور دور مثالي رهيو پر اسان کي ميان رضا رباني جون چڱايون آخري ڏينهن ڏسڻ ۾ آيون. هن چيو ته بلوچستان حڪومت ڪيرائڻ جي حوالي سان به اسان ڪيتريون ئي شڪايتون ٻڌيون آهن پر بلوچستان اسيمبلي جي ميمبرن جي وڏي وزير سان شڪايتن جو ازالو نه ڪيو ويو، هن چيو ته هاڻي هار جيت جو مرحلو گذري ويو آهي، هاڻي اڳتي وڌڻ جي ضرورت آهي، ڇا وڃايو ڇا حاصل ڪيو ان کي سمجهڻ جي ضرورت آهي، پارليامينٽ پنهنجو مدو پورو ڪندي، آئنده جنهن کي به اليڪش کانپوءِ اچڻو آهي ان کي اهو سڀ ڏسڻ جي ضرورت آهي، اسان کي ان ڳالهه جو ادراڪ ڪرڻو پوندو ته ايندڙ عام چونڊون صاف، شفاف، منصفاڻيون ۽ مداخلت کان پاڪ هجن اها ئي جمهوريت جي اصل فتح هوندي.