پاڪستان ڪشميري عوام جي اخلاقي، سياسي ۽ سفارتي حمايت جو عزم ڪيو آهي: وفاقي وزير سينيٽر پرويز رشيد

اسلام آباد (پاکستان نیوز پوائنٹ 06ستمبر 2016ء) اطلاعات، نشريات ۽ قومي ورثي واري وفاقي وزير سينيٽر پرويز رشيد چيو آهي ته پاڪستان ڪشميري عوام جي اخلاقي، سياسي ۽ سفارتي حمايت جو عزم ڪيو آهي ۽ اسان جو اهو يقين آهي ته مسئلي جو حل ڪشميري عوام جي خواهشن موجب گڏيل قومن جي قراردادن تي عمل ڪرڻ ۾ ئي آهي. هن اها ڳالهه ڪالهه اڱاري ڏينهن ڪشميري ميڊيا جي وفد سان ملاقات دوران چئي. ان موقعي تي وزيراعظم جو خصوصي معاون ڊاڪٽر آصف ڪرماڻي پڻ موجود هو. سينيٽر پرويز رشيد معصوم ڪشميرين تي ڀارتي فوج جي وحشياڻي ظلمن کي ڏاڍ قرار ڏيندي چيو ته اهڙيون دهشتگرد ڪارروايون ڪشميرين جي آزادي جي منصفاڻي نصب العين ۽ ان جي خودمختياري جي حق جي آواز کي دٻائي نه ٿو سگهي. هن ڪشميري ڀائرن سان پاڪستان جي يڪجهتي جي عزم جو پڻ اظهار ڪيو جن تي ڀارتي فوج ظلم ڪري رهي آهي. هن عالمي برادري تي زور ڏنو ته هو ڀارتي فوج پاران ٿيندڙ ظلمن خاص طور تي والاريل ڪشمير جي معصوم ٻارن، نوجوانن ۽ عورتن تي فائرنگ جو نوٽيس وٺي. هن چيو ته خودمختياري جي حق لاءِ والاريل ڪشمير جي عوام جون عظيم قربانيون رائيگان نه وينديون. ڪشمير ڪاز کي اجاگر ڪرڻ جي سلسلي ۾ ڪشميري ميڊيا جي ڪوششن کي ساراهيندي پرويز رشيد چيو ته حڪومت صحافين ۽ ميديا ورڪرز جي ڀلائي ۽ تحفظ جي لاءِ پنهنجا سمورا وسيلا استعمال ۾ آڻيندي. وفد وزير کي صحافين ۽ ميديا ورڪرز کي درپيش مسئلن کان آگاهه ڪيو ۽ انهن جي حل لاءِ مدد جي لاءِ چيو جنهن تي هن وفد کي مسئلن جي جلد حل جي خاطري ڪرائي. هن چيو ته جمهوري حڪومت اظهار راءِ جي آزادي تي يقين رکي ٿي ۽ ملڪ ۾ ميڊيا جي صنعت جي ترقي لاءِ تعاون جاري رکندي.