ايڪيهين صدي قدرتي ۽ انساني وسيلن سان مالامال ايشيا جي آهي: سرتاج عزيز

اسلام آباد (پاکستان نیوز پوائنٹ 29اگست 2016ء) پرڏيهي معاملن واري صلاحڪار سرتاج عزيز چيو آهي ته ايڪيهين صدي قدرتي ۽ انساني وسيلن سان مالامال ايشيا جي آهي، سي پيڪ تحت 5 صنعتي زون قائم ڪيا پيا وڃن، هر صوبي ۾ هڪ هڪ صنعتي زون قائم ڪيو ويندو، اقتصادي ترقي جي لاءِ اسان کي سلامتي جي چئلينجن تي ضابطو آڻڻو پوندو، سي پيڪ سان سموري خطي کي فائدو ٿيندو، ون بيلٽ ون روڊ ويزن سان پوري خطي ۾ ترقي ايندي، سي پيڪ منصوبي پاڪستان کي تيزي سان ترقي ڪرڻ جو موقعو فراهم ڪيو آهي. اهي ڳالهيون هن ڪالهه سومر ڏينهن هتي پاڪ چائنا سينٽر ۾ سي پيڪ سمٽ کي خطاب ڪندي چيون. پرڏيهي صلاحڪار چيو ته ڏکڻ ايشيا خاص طور تي ايشيا سمورن قدرتي ۽ انساني وسيلن سان ڀريل آهي ان جي لاءِ ايڪيهين صدي ايشيا کنڊ جي آهي. هن چيو ته سي پيڪ منصوبي خطي جي سمورن ملڪن خاص طور تي پاڪستان کي تيزي سان ترقي جو موقعو فراهم ڪيو آهي، ان منصوبي تحت پاڪستان ۾ 5 جديد ترين صنعتي زون قائم ڪيا ويندا، هر صوبي ۾ هڪ هڪ صنعتي زون قائم ٿيندو. هن چيو ته ون بيلٽ ون روڊ ويزن سان پاڪستان سميت خطي جي ملڪن ۾ خوشحالي ۽ ترقي ايندي. هن چيو ته خيبرپختونخواهه ۾ ماربل انڊسٽري جي ترقي لاءِ جديد ترين واٽرڪٽ ٽيڪنالاجي متعارف ڪرائي ويندي. ان مقصد جي لاءِ چين پاڪستان سان ويجهو تعاون ڪندو، چين اسان جو ويجهو پارٽنر آهي. هن چيو ته چين ترقي ۾ خطي جي سمورن ملڪن کان اڳتي نڪري ويو آهي ۽ هاڻي هو ترقي ۽ ٽيڪنالاجي جي ثمرن ۾ پنهنجي ويجهن ۽ دوست ملڪن کي شامل ڪرڻ چاهي ٿو.