چونڊ سڌارن جي بل ۾ ڪمزورين ۽ خامين کي ختم ڪري سگهجي ٿو: سيد نويد قمر

اسلام آباد (پاکستان نیوزپوائنٹ18اگست2017ء) پاڪستان پيپلزپارٽي جي اڳواڻ سيد نويد قمر چيو آهي ته چونڊ سڌارن کانپوءِ ايندڙ چونڊن جي نتيجن جي حوالي سان سوال اٿيا ته هي اسان جي اجتماعي ناڪامي هوندي، هاڻي وڌيڪ سڌارن جي ضرورت آهي، بل ۾ جتي ڪمزوريون ۽ خاميون آهن انهن کي ختم ڪري سگهجي ٿو. جمعي ڏينهن قومي اسيمبلي ۾ چونڊ سڌارن جو بل 2017ع جيڪو چونڊون منعقد ڪرائڻ بابت قانونن ۾ ترميمون گڏ ڪرڻ ۽ جامع بڻائن جو بل آهي، جي حوالي سان خيالن جو اظهار ڪندي سيد نويد قمر چيو ته هي سڄي مشق اڄ کان ٽي سال پهرين شروع ٿي هئي، 2013ع جي چونڊن کانپوءِ ڪنهن ان کي ڌانڌلي جو اليڪشن چيو ته ڪنهن آر او جو اليڪشن چيو، فيصلو ٿيو ته پارليامينٽ چونڊن جي لاءِ سڌارا ڪندي، ڪميٽي ۽ حڪومت انهن سڌارن جي حوالي سان تمام گهڻي محنت ڪئي آهي. جيڪڏهن ايندڙ چونڊن جي نتيجن جي حوالي سان به سوال اٿيو ته هي اسان جي اجتماعي ناڪامي هوندي، اليڪشن ۾ وفاقي ۽ صوبائي حڪومتن تي گهٽ کان گهٽ ۽ وڌ کان وڌ اليڪشن ڪميشن تي ڀاڙڻ گهرجي، اليڪٽرانڪ ووٽنگ مشينن سميت ڪيتريون ئي شيون ايندڙ چونڊن ۾ ممڪن نه ٿي سگهنديون، هن چيو ته هاڻي به ڪيترن ئي سڌارن جي ضرورت آهي، بل ۾ جتي ڪمزوريون ۽ خاميون آهن انهن کي ختم ڪري سگهجي ٿو ڇو ته هي ڪمزوريون اسان جي خلاف استعمال ٿي سگهن ٿيون، هڪ هڪ ووٽ جي لاءِ ڌڪا کائيندا آهيون ۽ عوام جي ووٽن سان چونڊجي هتي ايندا آهيون.