اسلام آباد (پاکستان نیوزپوائنٹ18اگست2017ء) وزيراعظم شاهد خاقان عباسي چيو آهي ته پاڪستان مسلم ليگ (ن) جي حڪومت عوام جي خدمت تي پختو يقين رکي ٿي ۽ عوامي مسئلن جي حل لاءِ خلوص دل سان ڪم ڪري رهي آهي، هن اها ڳالهه ڊيره غازي خان سان تعلق رکندڙ مسلم ليگ (ن) جي قومي اسيمبلي ميمبرن سان ڳالهائيندي چئي جنهن جمعي ڏينهن هتي ساڻس ملاقات ڪئي. قومي اسيمبلي ميمبرن وزيراعظم کي پنهنجي پنهنجي تڪن جي ترقياتي اسڪيمن جي باري ۾ آگاهه ڪيو. وزيراعظم چيو ته حڪومت ڏکڻ پنجاب جي ترقي تي ڌيان ڏئي رهي آهي ۽ ترقياتي اسڪيمن جي لاءِ هر ممڪن طور تي وڌ کان وڌ وسيلا مختص ڪيا ويندا. هن ناڻي واري وزارت کي هدايت ڪئي ته علائقي جي ترقياتي منصوبن جي لاءِ مختص سمورا فنڊ تيز تر بنيادن تي فراهم ڪيا وڃن. هن چيو ته هو ڊي جي خان جي ترقي بابت ڪنهن به مسئلي جي حل لاءِ سدائين دستياب هوندو، هن قومي اسيمبلي ميمبرن تي زور ڏنو ته هو واضح مثبت تبديلي آڻڻ جي لاءِ شوق سان ڪم ڪن. وزيراعظم سان ملاقات ڪندڙن ۾ وفاقي وزير سردار اويس احمد خان لغاري، مواصلات وارو مملڪتي وزير حافظ عبدالڪريم، قومي اسيمبلي ميمبر سردار محمد امجد فاروق خان کوسه، سردار محمد جعفر خان لغاري، حفيظ الرحمان دريشڪ، ملڪ سلطان محمد هنجرا، سردار عاشق حسين گوپانگ، صاحبزاده فيض الحسن، سيد محمد ثقلين شاهه بخاري ۽ مسز شهناز سليم ملڪ شامل هئا. ملاقات ۾ پارليماني معاملن جو وزير شيخ آفتاب احمد ۽ اطلاعات ۽ نشريات واري مملڪتي وزير مريم اورنگزيب به موجود هئي.
مسلم ليگ (ن) جي حڪومت عوامي مسئلن جي حل لاءِ خلوص دل سان ڪم ڪري رهي آهي: وزيراعظم شاهد خاقان عباسي
7 سال پھريان
