آپريشن ضرب عضب دوران 4250 گهرن مان 416 گهرن جي نئين سر تعميرجو ڪم شروع ڪيو ويو آهي: پارلياماني سيڪريٽري شاهين شفيق

اسلام آباد (پاکستان نیوزپوائنٹ 15 اگست2016ء) سيفران جي پارلياماني سيڪريٽري شاهين شفيق قومي اسيمبلي کي ٻڌايو آهي ته آپريشن ضرب عضب دوران 4250 گهرن مان 416 گهرن جي نئين سر تعمير جو ڪم شروع ڪيو ويو آهي، مڪمل تباهه ٿيندڙ گهرن کي چار لک ۽ جزوي طور تي نقصان جو شڪار ٿيندڙ گهرن کي هڪ لک 60 هزار رپيا ادا ڪيا ويا، سروي ۾ پارليامينٽ ميمبرن کي شامل ڪرڻ جي تجويز تي غور ڪيو ويندو. ڪالهه سومر ڏينهن قومي اسيمبلي جي اجلاس ۾ الحاج شاهه جي گل آفريدي جي آپريشن ضرب عضب فيز ون ۽ فيز ٽو آپريشنن جي نتيجي ۾ ملڪيتن جي تباهي ۽ نئين سر تعمير بابت ڌيان ڇڪايو نوٽيس جو جواب ڏيندي پارلياماني سيڪريٽري شاهين شفيق چيو ته خيبرپختونخواهه ۾ جيترا به گهر تباهه ٿيا وفاق انهن جي تعمير جي لاءِ 5 ارب رپيا فراهم ڪيا. سروي موجب مڪمل تباهه ٿيندڙ 4250 گهرن مان 416 گهرن جي نئين سر تعمير جو ڪم شروع ڪيو ويو آهي. ڌيان ڇڪايو نوٽيس تي الحاج شاهه جي گل آفريدي، بلال الرحمان، محمد جمال الدين ۽ سيد غازي گلاب جمال جي سوالن جي جواب ۾ شاهين شفيق چيو ته مڪمل تباهه ٿيندڙ گهرن کي چار لک ۽ جزوي طور تي نقصان جو شڪار ٿيندڙ گهرن کي هڪ لک 60 هزار رپيا ادا ڪيا ويا. هڪ ٻئي سوال جي جواب ۾ پارلياماني سيڪريٽري چيو ته سروي ۾ پارليامينٽ ميمبرن کي به شامل ڪرڻ جي تجويز تي غور ڪيو ويندو. هڪ ٻئي سوال جي جواب ۾ پارلياماني سيڪريٽري شاهين شفيق چيو ته گهرن ڏانهن واپس ويندڙ هر خاندان کي 35 هزار رپيا روڪ رقم ڏني وئي. اي پي پي/ع – ک/ش – چ 20:14