اهو تاثر صحيح نه آهي ته ملڪ ۾ هر هنڌ لاقانونيت آهي: وفاقي وزير ليفٽيننٽ جنرل (ر) عبدالقادر بلوچ

اسلام آباد (پاکستان پوائنٹ نیوز 03 -اگست 2016ء) وفاقي وزير ليفٽيننٽ جنرل (ر) عبدالقادر بلوچ چيو آهي ته اهو تاثر صحيح نه آهي ته ملڪ ۾ هر هنڌ لاقانونيت آهي، هندو مسلمان برابر جا پاڪستاني شهري آهن، مذهب جي بنياد تي ڪو به فرق نه پيو رکيو وڃي، اربع ڏينهن قومي اسيمبلي ۾ اعتراض واري نقطي تي ڊاڪٽر رميش ڪمار چيو ته ملڪ ۾ اسان کي انساني حقن جي خلاف ورزين تي ڌيان ڏيڻ گهرجي، جڏهن به اسان ڪو مسئلو کڻندا آهيون ته چيو ويندو آهي ته ڪا لاقانونيت نه آهي، ان تي پيپلزپارٽي جي ميمبر عبدالستار بچاڻي ڪاوڙ ۾ اچي ويو ۽ ان بنا اجازت ڳالهائڻ شروع ڪري ڇڏيو، وفاقي وزير جنرل (ر) عبدالقادر بلوچ چيو ته اسان سڀ پاڪستاني آهيون، مرڪز ۽ صوبن ۾ نظام موجود آهي، اهو چوڻ صحيح نه آهي هر هنڌ لاقانونيت آهي، هندو هجي يا مسلمان هر هڪ ملڪ جو شهري آهي، مذهب جي بنياد تي ڪو به امتياز نه رکيو وڃي. آئين به ان جي اجازت نٿو ڏي. اياز سومرو چيو ته حڪومتي ميمبر الزام لڳايو آهي ته لاڙڪاڻي ۾ ڌرم شالا کي ساڙيو ويو آهي، جيڪو صحيح نه آهي، هن ايوان ۾ سڀني ميمبرن سان هڪجهڙو ورتاءُ ٿيندو آهي.