قومي اسيمبلي پاران ڪشمير ۾ ڀارتي ظلمن خلاف مذمتي قرارداد منظور

اسلام آباد (پاکستان پوائنٹ نیوز۔ یکم اگست۔2016ء) قومي اسيمبلي والاريل ڪشمير ۾ انساني حقن جي سنگين خلاف ورزين ۽ پرامن مظاهرين تي ڀارتي فوج جي ظلمن خلاف مذمتي قرارداد اتفاق راءِ سان منظور ڪري ورتي آهي جنهن ۾ چيو ويو آهي ته گڏيل قومن جي سلامتي ڪائونسل جي قراردادن موجب ڪشميرين کي خودمختياري جو حق ڏنو وڃي، جنيوا ۾ گڏيل قومن جي انساني حقن جي ڪميشن ڀارتي سيڪيورٽي فورسز پاران والاريل ڪشمير ۾ انساني حقن جي سنگين خلاف ورزين جي جائزي لاءِ فيڪٽ فائنڊنگ مشن والاريل ڪشمير موڪلي. ڪالهه سومر ڏينهن قومي اسيمبلي ۾ وفاقي وزير زاهد حامد قرارداد قومي اسيمبلي ۾ پيش ڪئي، قرارداد ۾ چيو ويو آهي ته هي ايوان والاريل ڪشمير ۾ ڪشميرين تي ظلمن جي سخت مذمت ڪري ٿو جنهن جي نتيجي ۾ 50 کان وڌيڪ ماڻهو شهيد ۽ 5 هزار کان وڌيڪ زخمي ٿيا آهن، هي ايوان ڀارتي فوجن پاران پيلٽ گنز جي استعمال جي مذمت ڪري ٿو جنهن سان ڪيترائي ماڻهو نابينا ٿي ويا آهن، والاريل ڪشمير ۾ برهان واني سميت ڪشميرين جي عدالتن کان مٿانهين قتل، پرامن احتجاج ڪندڙ مظاهرين جي خلاف طاقت جي استعمال جي هي ايوان ڀرپور مذمت ڪري ٿو ۽ والاريل ڪشمير جي عوام جي آزادي جي جدوجهد جي سياسي، سفارتي ۽ اخلاقي حمايت جاري رکڻ جي عزم کي ورجائي ٿو. قرارداد ۾ حڪومت کي چيو ويو آهي ته هو عالمي برادري، حڪومتن، غيرسرڪاري تنظيمن، سول سوسائٽي ۽ ميڊيا تي زور ڏي ته هو والاريل ڪشمير ۾ رياستي دهشتگردي ۽ انساني حقن جي خلاف ورزين جو نوٽيس وٺن. والاريل ڪشمير ۾ لاڳو اسپيشل پاور ايڪٽ 1999ع ۽ پبلڪ سيفٽي ايڪٽ 1998ع سميت ٻيا ڪارا قانون ختم ڪيا وڃن. ميڊيا تي پابنديون ختم ڪيون وڃن. گڏيل قومن جي سلامتي ڪائونسل جي قراردادن تي عمل ڪندي ڪشميرين کي خودمختياري جو حق ڏنو وڃي. انساني حقن واري ڪميشن جو فيڪٽ فائنڊنگ مشن والاريل موڪليو وڃي جيڪو ڀارتي سيڪيورٽي فورسز پاران ظلمن جو جائزو وٺي، اسپيڪر قرارداد ايوان ۾ پيش ڪئي جنهن متفقه طور تي منظور ڪيو ويو.