اسلام آباد (پاکستان نیوز پوائنٹ 22فروری2016ء) قومي اسيمبلي جي ناڻي، روينيو، اقتصادي معاملن، شمريات ۽ نجڪاري بابت اسٽينڊنگ ڪميٽي زرعي قرضن تي وياج جي پاليسي تي نظرثاني ڪرڻ جي هدايت ڪندي چيو آهي ته زراعت جي شعبي لاءِ قرضن تي شرح جي شرح صنعتي شعبي جي برابر هجڻ گهرجي. ڪميٽي جو اجلاس چيئرمين قيصر احمد شيخ جي صدارت ۾ ڪالهه اربع ڏينهن پارليامينٽ لاجز ۾ ٿيو. ڪميٽي زرعي شعبي جي قرضن تي وياج جي وڌيڪ شرح ۾ مناسب گهٽتائي ۽ ملڪ ۾ فرٽيلائيزر جي اوپن امپورٽ جي امڪانن بابت معاملن جو جائزو ورتو. ڪميٽي ناڻي ۽ روينيو واري وزارت ۽ زرعي ترقياتي بئنڪ کي زراعت جي شعبي جي لاءِ مارڪ اپ پاليسي تي نظرثاني ڪرڻ جي هدايت ڪئي ۽ چيو ته زرعي قرضن تي مارڪ اپ جي شرح صنعتي شعبي جي برابر هجڻ گهرجي. ان موقعي تي ناڻي واري سيڪريٽري ڪميٽي کي ٻڌايو ته حڪومت ايندڙ بجيٽ ۾ آبادگارن کي سبسڊي پئڪيج ڏيڻ جو ارادو رکي ٿي. نيشنل بئنڪ ۽ زرعي ترقياتي بئنڪ زرعي شعبي جي لاءِ پنهنجي مارڪ اپ ريٽس ۾ اڳ ۾ ئي گهٽتائي ڪري ڇڏي آهي. صنعت ۽ پيداوار واري وزارت پاران ڪميٽي کي ٻڌايو ويو ته فرٽيلائيزر سيڪٽر ڀاڻ برآمد ڪري رهيو آهي. ڪميٽي ڀاڻ انڊسٽري پاران ڀاڻ جي درآمد تي پنهنجي خدشن جو اظهار ڪيو. اجلاس ۾ نيب عملدارن ڪميٽي کي بنگلاديش ۾ نيشنل بئنڪ آف پاڪستان جي اسڪينڊل بابت جاچ جي صورتحال بابت آگاهه ڪيو. هن چيو ته ان حوالي سان ريفرنس تيار ڪيو ويو آهي جيڪو منظوري جي لاءِ اڄ خميس ڏينهن نيب بورڊ ۾ پيش ڪيو ويندو. اسٽينڊنگ ڪميٽي ان حوالي سان تفصيل ايندڙ اجلاس ۾ پيش ڪرڻ جي هدايت ڪئي. اجلاس ۾ اسٽيٽ بئنڪ آف پاڪستان جي گورنر پاڪستان ۽ ايران جي وچ ۾ مقامي ڪرنسي ۾ واپار جي تجويز بابت بريفنگ ڏني ۽ چيو ته اهو معاملو جلد حل ٿي ويندو. اسٽينڊنگ ڪميٽي هايئر ايجوڪيشن ڪميشن جي پي ايس ڊي پي جي سفارش ڪئي ۽ اعليٰ تعليم جي شعبي ۾ ان جي ڪارڪردگي کي ساراهيو.
قومي اسيمبلي جي ناڻي، روينيو، اقتصادي معاملن، شمريات ۽ نجڪاري بابت اسٽينڊنگ ڪميٽي جو اجلاس
7 سال پھريان
