تہران(پاکستان پوائنٹ نیوز07۔فروری2017ء) ایران نے آکھیا اے کہ امریکی صدر ڈونلڈ ٹرمپ دیاں دھمکیاں دا جواب دس فروری نوں دیاں گے۔ تفصیل دے مطابق تہران وچ ایرانی فوجی افسر اں نال خطاب کردے ہوئے ایران دے رہبر اعلی آیت اللہ علی خامنائی نے آکھیا اے کہ امریکا دے نویں صدر ڈونلڈ ٹرمپ نے دنیا نوں اپنے ملک دا صل مہاندرا وکھا دِتا اے۔ آیت اللہ علی خامنائی دا ایہ وی کہنا سی کہ امریکا دے نویں رہنما دے اقدامات ایہناں گلاں دے ثبوت نیں جو ایران 30ورھیاں توں کردا آیا اے۔
اوہناں نے آکھیا کہ ایران آکھ رہیا اے کہ امریکی انتظامیا کئی قسماں دی کرپشن دا شکار اے تے صدر ٹرمپ وی ایہو آکھ رہے نیں۔اوہناں دا کہنا سی کہ اسیں ٹرمپ دے مہربان آں کہ اوہناں نے ساڈی زندگی آسان بنا دِتی تے امریکا دا اصل مہاندرا دنیا نوں وکھا دِتا۔ اپنی انتخابی مہم تے اوہدے مگروں وی اوہناں نے ایس گل دی تصدیق کیتی جو اسیں تن دہاکیاں توں امریکی حکومت، انتظامیادی سیاسی، اقتصادی، اخلاقی تے معاشرتی کرپشن بارے آکھدے آئے آں۔
علی خامنائی ولوں ایہ بیان امریکی صدر ولوں ایران تے عالمی طاقتاں وچکار ایٹمی سمجھوتے اُتے تنقید تے ایران اُتے نویاں پابندیاں لان مگروں ساہمنے آیا اے۔ اوہناں نے آکھیا کہ کوئی دشمن ایرانی قوم نوں مفلوج نہیں کر سکدا۔ اوہناں دا کہنا سی کہ ٹرمپ کہندا اے کہ سانوں اوہدے توں ڈرنا چاہیدا پر ایرانی لوکائی اوہناں دیاں گلاں دا جواب دس فروری نوں دیوے گی تے دَسے گی کہ ایس طرحاں دیاں دھمکیاں اُتے کیہ ردعمل وکھایا جاندا اے۔
یاد رہوے کہ صدر ٹرمپ دی حلف برداری مگروں اپنی پہلی تقریر وچ خامنائی دا کہنا سی کہ ایرانی قوم امریکی صدر دیاں دھمکیاں توں ڈرن والی نہیں اے۔دوجے پاسے امریکی صدر نے 29جنوری نوں ایرانی بیلسٹک میزائل تجربے مگروں اپنے بیان وچ آکھیا سی کہ ایران اگ نال کھیڈ رہیا ۔ ایس تجربے مگروں امریکی حکومت نے 13بندیاں تے درجن توں ودھ کمپنیاں اُتے ہور پابندیاں لا دِتیاں سن۔ پابندیاں دا شکار ہون والیاں وچ کُجھ لوکاں دا تعلق ایرانی ’پاستداران انقلاب‘ توں وی اے۔
