دہشت ہون دے شبھے وچ امریکی ائر پورٹ اُتے 5سال دے بال نوں گرفتار کر لیا گیا، کئی گھنٹے پُچھ گچھ کیتی گئی: وائٹ ہاﺅس دا دعوا

دہشت ہون دے شبھے وچ امریکی ائر پورٹ اُتے 5سال دے بال نوں گرفتار کر لیا گیا، کئی گھنٹے پُچھ گچھ کیتی گئی: وائٹ ہاﺅس دا دعوا

واشنگٹن(پاکستان پوائنٹ نیوز01۔فروری2017ء) وائٹ ہاﺅس ولوں جاری بیان وچ آکھیا گیا اے کہ امریکی ائر پورٹ اُتے 5ورھیاں دے بال نوں مبینہ خطرے پاروں چار گھنٹے حراست وچ رکھیا گیا۔ ٹرمپ انتظامیا نے 5ورھیاں دے بال نوں مبینہ طور اُتے سکیورٹی رسک قرار دیندے ہوئے چار گھنٹے ہتھکڑیاں پوائے حراست وچ رکھیا۔ 5ورھیاں دا بال اپنی ایرانی ماں نال موجود سی تے اجیہے سینکڑیاں بندیاں وچ شامل سی جہناں نوں ٹرمپ ولوں نویں امیگریشن پالیسی مگروں گرفتار کیتا گیا۔

ٹرمپ دے سیکرٹری نے ایس سارے معاملے اُتے افسوس دا وکھالا کرن دی بجائے آکھیا کہ کسے دی جنس تے عمر پاروں اوہنوں سکیورٹی رسک دے طور اُتے پرکھنا غلط گل اے۔ میڈیا وچ جاری فوٹیج وچ وکھایا گیا کہ 5ورھیاں دے بال دی ماں پریشانی وچ اپنے بال دی اُڈیک وچ بیٹھی رہی، پُتر نال ملن مگروں ایرانی سوانی نے اپنے پُتر لئی انگریزی وچ ہیپی برتھ ڈے گایا جدکہ 5ورھیاں دا اوہدا پُتر وی ماں دے سینے لگ ڈاڈھا رویا۔ ایہ منظر ویکھ کے ائر پورٹ اُتے موجود بندے وی خش ہوئے۔ بعدوں سوانی نے میڈیا نال گل بات کرن توں انکار کر دِتا۔ ایس واقعے مگروں اک وار فیر ٹرمپ تے ٹرمپ ولوں بنائی گئی نویں امیگریشن پالیسی خلاف احتجاج شروع ہو گیا اے۔