نویں دِلی(پاکستان پوائنٹ نیوز28۔جنوری2017ء) بھارت وچ جتھے کئی ریاستاں اندر وکھ ہون دیاں تحریکاں چل رہیاں نیں اوتھے مودی سرکاری دے لوکائی مخالف فیصلیاں مگروں ریاست تامل ناڈو دے شہری وی احتجاج کر رہے نیں تے ایس دوران اوہناں نے بھارت خلاف نعرے وی لائے۔ بھارتی میڈیا جنوبی ریاست تامل ناڈو دے وزیر اعلا نے اسمبلی اجلاس دے دوران اپوزیشن دے توجہ دواﺅ نوٹس اُتے جواب دیندے ہوئے آکھیا کہ پچھلے دِنا ای چنئی وچ جلی کٹورسم دے حامی وکھالویاں اُتے پولیس ولوں کیتا جان والا تشدد ملک مخالف نعریاں دی وجہ سی جدکہ وکھالویاں نے اسامہ بن لادن دے پوسٹر وی پھڑے ہوئے سن۔
اوہناں نے آکھیا کہ غیر سماجی عناصر تے تنظیماں جلی کٹورسم دے حامی وکھالویاں نوں ریاست تے ملک مخالف سرگرمیاں لئی اُکسار رہیاں نیں پر جے پولیس نے زیادتی کیتی اے تے ذمے واراں خلاف کاروائی ہوئے گی۔ وزیر اعلا نے پولیس دا دفاع کردے ہوئے آکھیا کہ جے ریاست مخالف نعرے لگن گے تے اوہنوں دَبن دی کوشش کیتی جائے گی تے ایس سلسلے وچ پولیس نے اتھر گیس دی شیلنگ تے ڈنڈے وی مارے جدکہ وکھالویاں دے پولیس اُتے تشدد پاروں کئی اہلکار زخمی وی ہوئے۔
