حیدر آباد(پاکستان پوائنٹ نیوز23۔جنوری2017ء) عالمی پَدھر اُتے مشہور اسلامی سکالر ڈاکٹر ذاکر نائیک خلاف مودی سرکاری دیاں انتقامی کارروائیاں دا سلسلا رُکن دا ناں ای نہیں لے رہیا۔تفصیل دے مطابق ہندوستانی انٹیلی جنس ایجنسی نے بی جے پی لیڈر دے قتل دی مبینہ سازش دے بے بنیاد الزام وچ گرفتار مسلمان سید ذاکر رحیم دا تعلق ڈاکٹر ذائر نائیک نال جوڑ دِتا اے۔
سید ذاکر رحیم نوں پچھلے ورھے مئی وچ سعودی عرب نے گرفتار کیتا سی، سعودی عرب توں دِلی پہنچدے ای نیشنل انوسٹی گیشن ایجنسی (این آئی ای) سید ذاکر رحیم نوں ائر پورٹ توں گرفتار کر کے حیدر آباد لے گئی۔ بھارتی ٹی وی دے مطابق ہندوستانی انٹیلی جنس ایجنسیاں نے سعودی عرب وچ پچھلے ورھے مئی وچ گرفتار ہون والے مسلمان نوجوان سید ذاکر رحیم نوں دِلی توں گرفتار کر لیا اے، گرفتار کیتے گئے مشہور بندے دا تعلق مشہور اسلامی مبلغ ڈاکٹر ذاکر نائیک نال جوڑ دِتا گیا۔
ایس توں پہلے بھارتی ایجنسیاں سید ذاکر رحیم اُتے لشکر طیبہ تے حرکتہ الجاد الاسلامی نال رلکے بھارت دی حکمران جماعت بی جے پی دے اہم رہنماواں دے قتل دی سازش کرن دا الزام لا چکی اے۔ بھارتی اداریاں دا کہنا اے کہ سید ذاکر رحیم بھارت وچ ہیڈ منی مقرر کیتے جان والے مشہور دہشت گرد فرحت اللہ غوری دا سالا اے۔ نیشنل انوسٹی گیشن ایجنسی نے الزام لاندے ہوئے آکھیا اے کہ ذاکر رحیم سعودی عرب وچ لوکاں دیاں ڈاکٹر ذاکر نائیک نال ملاقاتاں کروان مگروں اوہناں دی برین واشنگ کر کے اوہناں نوں دہشت گردی لئی ورتدا سی۔
