ریاض(پاکستان پوائنٹ نیوز23۔جنوری2017ء) سعودی عرب دی اک پڑھیارن نے ڈرائیور دے سو جان مگروں چلدی بس نوں کنٹرول کر کے حادثے توں بچاندے ہوئے اوہدے وچ سوار 55پڑھیارناں دی زندگی بچا لئی۔ میڈیا رپورٹ دے مطابق سکول دیاں پڑھیارناں دی زندگی بچان تے اوہناں دی مدد کرن والی سکینڈری سکول دی پڑھیارن فاطمہ نے دسیا کہ ایہ واقعہ مکہ مکرمہ گورنری وچ اوس ویلے پیش آیا جدوں اوہ تے ہور 55پڑھیارناں امتحان مگروں اپنے گھر واپس جا رہیاں سن۔
اوہ ساریاں اک بس وچ سوار سن جہنوں اک پاکستانی ڈرائیور چلا رہیا سی۔ فاطمہ نے دسیا کہ ڈرائیور بڑا تھکیا ہویا سی تے ڈرائیونگ دے دوران ای اوہ سو گیاجدکہ بس سڑک توں ہٹن لگی تے اوہدا اک پاسا لاگے موجود الیکٹرک روم ول سی۔ فاطمہ دا کہنا سی کہ اوہ ریتلے علاقے وچ سفر دے دوران تھوڑی بُہتی ڈرائیونگ کر لیندی سی۔ ایس لئی جدوں اوہنے بس نوں اپنے ٹریک توں ہٹدے ویکھیا تے اوہنوں چھیتی ای کنٹرول کیتا تے اوہنوں اگانہ ٹورن دی بجائے پچھلا گیر لا کے اوہنوں پچھانہ کیتا تاں جے بجلی دے کھمبے نال ٹکر کھا کے اوہ رُک جائے تے کسے وڈے حادثے توں بچ جائے۔
فاطمہ دی ایس کوشش پاروں بس رُک وی گئی تے انج اوہدے نال بس وچ موجود ہور پڑھیارناں ایس حادثے توں بچ گئیاں۔ فاطمہ دا کہنا سی کہ اوہ ڈرائیور دی پچھلی سیٹ اُتے بیٹھی سی جدوں بس اپنے راہ توں ہٹن لگی تے پڑھیارناں نے رولا پانا شروع کر دِتا پر اوہنے ہمت کر کے بس نوں کنٹرول کیتا تے اوہنے کھمبے نال مار دِتا۔ مکہ مکرمہ دے محکما تعلیم ولوں فاطمہ تے اوہدی اک ہور سہیلی نوں ایس کم اُتے اعزازی سرٹیفکیٹ وی دِتا گیا جہدے وچ اوہناں دی تعریف کیتی گئی اے۔ دوجے پاسے محکما تعلیم نے ڈرائیوراں دے ڈاکٹری معائنے دا وی مطالبا کیتا اے۔
