کولکتا(پاکستان پوائنٹ نیوز20۔جنوری2017ء) 11ویں جماعت دے پڑھیار نے مبینہ طور اُتے سکول وچ ہون والی روز دی بے عزتی کارن اپنی زندگی دا خاتما کر لیا۔ تفصیل دے مطابق سمپرت بٹرجی نے سماجی رابطے دی ویب سائٹ فیس بک اُتے اپنے پیغام وچ ’گڈ بائے‘ لکھیا پر کسے نوں کیہ پتا سی کہ ایہ پیغام پوسٹ کرن دے بعد سمپرت اپنی زندگی دا خاتمہ ای کر لوے گا۔ اگلی سویر جمعرات نوں سمپرٹ دی لاش کمرے دے پکھے نال لَٹکی ہوئی برآمد ہوئی۔
سمپرت دے دوستاں دا مَننا اے کہ امتحان وچ گھٹ نمبر آن اُتے سکول ٹیچر دیاں جھڑکاں تے ساریاں ساہمنیاں ملن والی سزا نے سمپرت نوں ایہ کم لئی مجبور کیتا۔ سمپرت دی ماں نے ایس گل دا اعتراف کیتا کہ اسیں سمپرت نال پڑھائی دے معاملے وچ سختی کیتی سی پر نال ای اوہناں نے اپنے پُتر دی موت دا سارا ملبہ سکول اُستانی اُتے ای پاندے ہوئے آکھیا کہ سمپرت اک اجیہے سکول وچ پڑھدا سی جتھے مُنڈے ، کُڑیاں اکٹھے بِہندے نیں تے ایس طرحاں دے ماحول وچ سکول ٹیچر دا ڈیلی سمپرت نوں جھاڑنا تے ساریاں ساہمنے سزا دینا سمپرت لئی برداشت جوگ نہیں سی۔
ایتھوں تک کہ سزا دے خوف پاروں سمپرت نے سکول جانا وی چھڈ دِتا سی۔سمپرت دی ماں نے ہور دسیا کہ جمعرات دی سویر جدوں میں سمپرت نوں جگان اوہدے کمرے وچ گئی تے اوتھے سمپرت دی لاش پکھے نال لَٹک رہی سی۔
