ایکواڈور(پاکستان پوائنٹ نیوز20۔جنوری2017ء) وکی لیکس دے بانی جولین اسانج نے آکھیا اے کہ حقاں دی ضمانت دِتی جائے تے امریکا جان نوں تیار آں، جو کُجھ آکھیا اوہدے اُتے قائم آں۔ غیر ملکی میڈیا دے مطابق وچکارلے لندن وچ ایکواڈدور دے سفارتخانے وچ پناہ لین والے جولین اسانج نے ویڈیو کانفرنس وچ آکھیا کہ میں جو کُجھ وی آکھیا اوہدے اُتے قائم آں، فوجی تجزیا کار چیلسی دی رہائی دا مئی توں پہلے کوئی امکان نہیں اے۔
یاد رہوے کہ امریکی صدارتی انتخابات توں پہلے وکی لیکس دے بانی جولین اسانج دا انٹرنیٹ کنکشن کٹ دِتا گیا سی۔ وکی لیکس دے بانی نے ہیلری کلنٹن بارے خفیا دستاویزات نوں ساہمنے لیاندا سی۔دستاویزات وچ امریکی مالیاتی ادارا گولڈ مین ساکس لئی ہیلری کلنٹن دیاں تن تقریراں دے مسودے جاری کیتے گئے سن۔ ایس توں وکھ جولین اسانج دو ہزار بارھاں توں لندن وچ ایکواڈور دے سفارت خانے وچ رہ رہے نیں جدکہ اوہ امریکا دے مطلوب بندیاں دی فہرست وچ وی شامل نیں۔
