تہران(پاکستان پوائنٹ نیوز05۔جنوری2017ء) متحدہ عرب امارات وچ شیر تے چیتے ورگے جنوراں نوں پالتو جنور دے طور اُتے رکھنا غیر قانونی قرار دے دِتا گیا اے۔ برطانوی نشریاتی ادارے دے مطابق تیل نال مالا مال خلیجی ملکاں وچ کئی بندیاں لئی شیر یاں چیتا رکھنا اپنی شان سمجھیا جاندا اے پر ہن انج کرن والیاں نوں جیل یاں جرمانے دا ساہمنا کرنا پے سکدا اے۔
نویں قانون دے تحت ذکر کیتے گئے جنگلی تے پالتو پر خطرناک جنوراں دی ویچ وٹک تے اوہناں دی ملکیت اُتے پابندی ہووے گی۔ ایہناں جنوراں نوں ہن صرف چڑیا گھراں، وائلڈ لائف پارک، سرکس تے بریڈنگ اینڈ ریسرچ سینٹرز وچ رکھیا جائے گا۔ جو کوئی وی شیر چیتے یاں کسے وی قسم دے خطرناک جنوراں نوں عوامی تھاواں اُتے لیائے گا اوہنوں چھ مہینے جیل تے 5لکھ درہم جرمانے دی سزا دا ساہمنا کرنا پئے گا۔ ایس توں وکھ جے کوئی وی بندا دوجیاں نوں جنوراں توں ڈرائے گا ، اوہنوں 7لکھ درہم جرمانا دینا پے سکدا اے۔ نویں قانون دے تحت کتے رکھن والیاں نوں پرمٹ لینا پئے گا تے عوامی تھاواں اُتے جنوراں نوں لیجاندے ہوئے اوہناں نوں بنھنھاپئے گا۔
