ڈونلڈ ٹرمپ دا اک وار فیر امریکا وچ مسلماناں خلاف سخت قانون بنان دا اشارا

جو کجھ ہو رہیا اے اوہ افسوسناک اے تواریخ نے ہمیشہ مینوں درست ثابت کیتا: ڈونلڈ ٹرمپ

ڈونلڈ ٹرمپ دا اک وار فیر امریکا وچ مسلماناں خلاف سخت قانون بنان دا اشارا
جو کجھ ہو رہیا اے اوہ افسوسناک اے تواریخ نے ہمیشہ مینوں درست ثابت کیتا: ڈونلڈ ٹرمپ

فلوریڈا(پاکستان پوائنٹ نیوز22۔دسمبر2016ء) امریکا دے نویں چُنے گئے صدر ڈونلڈ ٹرمپ نے جرمنی تے ترکی وچ ہون والے حملیاں نوں افسوسناک قرار دیندے ہوئے اک وار فیر مسلماناں لئی سخت قانون بنان دا اشارا دِتا۔ تفصیل دے مطابق فلوریڈا وچ میڈیا نال گلبات کردے ہوئے مسلماناں اُتے پابندی بارے پُچھے گئے سوال اُتے ڈونلڈ ٹرمپ دا کہنا سی کہ تواریخ نے ہمیشہ مینوں 100فیصد درست ثابت کیتا، جو کجھ ہو رہیا اے اوہ بہت افسوسناک اے تے تہانوں لوکاں نوں میرا پلان چنگی طرحاں پتا اے۔

اوہناں دا کہنا سی کہ جرمنی وچ کرسمس مارکیٹ وچ ہون والا حملا انسانیت اُتے حملا اے تے ایس طرحاں دے حملیاں نوں جلدی روکنا چاہیدا۔ امریکی صدارتی الیکشن دے دوران ڈونلڈ ٹرمپ نے مسلماناں دے امریکا وچ داخلے اُتے پابندی دا مطالبا کیتا سی جدکہ سیاسی تجزیا کاراں دا کہنا اے کہ ایس گل دا بہت امکان اے کہ جنوری وچ امریکی صدردا عہدا سنبھالدے ای ڈونلڈ ٹرمپ مسلماناں دے امریکا وڑن دے حوالے نال سخت قانون بنان گے۔

یاد رہوے کہ 2دن پہلے جرمنی وچ ہون والے ٹرک حملے دے بعد اپنے بیان وچ ڈونلڈٹرمپ نے آکھیا سی کہ داعش تے اسلامی شدت پسند تنظیماں عالمی جہاد دے منصوبے اُتے عمل کردے ہوئے اپنے اپنے علاقیاں وچ عیسائیاں نوں قتل کر رہیاں نیں تے اوہناں دی عبادت گاہواں نوں تباہ کیتا جا رہیا اے۔ اوہناں دا کہنا سی کہ ایس ہفتے یورپ وچ ہون والے پرتشد حملے نے ایہ ثابت کر دِتا اے کہ اوہ ٹھیک سوچ رہے نیں۔ اوہناں دا کہنا سی کہ اگلے مہینے جدوں اوہ اعہدا سنبھالن گے، مسلماناں دے امریکا وچ داخلے دے سلسلے وچ ڈاڈھی پُن چھان کرن گے۔اوہناں دا کہنا سی کہ جرمنی وچ کرسمس مارکیٹ وچ ہون والا حملا انسانیت اُتے حملا اے تے ایس طرحاں دے حملیاں نوں جلدی روکنا چاہیدا