بوسنیا(پاکستان پوائنٹ نیوز21۔دسمبر2016ء) پاکستان تے بوسنیا نے دفاع، توانائی، تجارت تے سرمایا کاری سنے مختلف شعبیاں وچ تعاون ودھان اُتے اتفاق کیتا اے، دوویں ملکاں نے ثقافت تے تعلیم دے شعبیاں وچ وی تعاون اُتے اتفاق کیتا۔ تفصیل دے مطابق وزیر اعظم نواز شریف نے بوسنیا دے وزیر اعظم نال ملاقات دے بعد سانجھی پریس کانفرنس کردے ہوئے آکھیا کہ ملاقات وچ وزیر اعظم بوسنیا ڈاکٹر ڈینس زوویدے نال دو پاسی تعلقات بارے تفصیلی غور کیتا گیا جدکہ ملاقات دوران توانائی تے دفاعی شعبے اُتے وچار وٹاندرا کیتا گیا۔
پریس کانفرنس دوران بوسنیا دے وزیر اعظم دا کہنا سی کہ پاکستان نال تعلقات ودھان لئی بوسنیا دی کوشش سلاہن جوگ اے۔ ایس توں وکھ ایس موقعے اُتے پاکستانی وزیر اعظم میاں نواز شریف دا کہنا سی کہ بوسنیا نال ٹیکسٹائل تے زراعت دے شعبیاں وچ تعاون چاہنے آں، پاکستان نوں نمائش وچ رلت دی دعوت اُتے بوسنیا دے شکر گزار آں۔ اوہناں نے آکھیا کہ پاکستانیاں دا وفد جلد بوسنیا دا دورا کرے گا۔
وزیر اعظم نواز شریف نے میزبان وزیر اعظم نوں آکھیا کہ اوہ پاکستان وچ سرمایا کاری دے بہترین ماحول توں فائدا چُکن۔ ایس موقعے اُتے بوسنیا دے وزیر اعظم ڈینس زویدے وچ نے آکھیا کہ ویلا آ گیا اے دوویں ملک اپنے تعلقات نوں نویں سطح اُتے لے جان۔ ایس توں پہلے پی ایم ہاﺅس آمد اُتے وزیراعظم نواز شریف نوں گارڈ آف آنر پیش کیتا گیا۔
