واشنگٹن(پاکستان پوائنٹ نیوز16۔دسمبر2016ء) امریکی صدر براک اوباما نے آکھیا اے کہ امریکی صدارتی الیکشن وچ مبینہ مداخلت کرن اُتے روس خلاف کارروائی کیتی جائے گی۔برطانوی نشریاتی ادارے دے مطابق اوہناں نے ایہ گل این پی آر نال کردے ہوئے آکھی۔ اوہناں نے آکھیا کہ سانوں ایکشن لین دی لوڑ اے تے اسیں لواں گے وی۔ ایس توں پہلے وائٹ ہاﺅس دا کہنا سی کہ امریکی الیکشن دے دِناں وچ ہون والی ہیکنگ وچ روسی صدر براہ راست ملوث سن۔
وائٹ ہاﺅس ولوں جاری بیان دے کُجھ گھنٹیاں بعد صدر اوباما نے آکھیا کہ میرے خیال وچ ایس گل اُتے کوئی شک نہیں کہ جدوں اک غیر ملکی الیکشن دی ساکھ اثر انداز ہوندی اے تے سانوں اوہدے اُتے ایکشن لین دی لوڑ اے تے اسیں ایہ کارروائی اپنی مرضی نال کراں گے۔ صدر اوباما دا ہور کہنا سی کہ پیوٹن ایس حوالے نال ساڈے جذبات توں جانو نیں کیوں جے میں اوہناں نال براہ راست ایس بارے گل کیتی اے۔
صدر بارک اوباما دے مشیر بین روڈیس دا کہنا سی کہ جِنا اسیں روس دے معاملات بارے جاندے آں کہ کیویں پیوٹن حکومت نوں کنٹرول کردی اے۔ اوہناں دا کہنا سی کہ اسیں اہم سائبر ہدایتاں دی گل کر رہے آں، اسیں حکومت دی اعلا ترین سطح دی گل کر رہے آں۔ این بی سی نے رپورٹ وچ آکھیا اے کہ امریکا کول ثبوت نیں کہ پیوٹن ذاتی طور اُتے ہدایتاں دیندے رہے نیں کہ کس طرحاں روسی انٹیلی جنس ولوں ہیک کیتیاں گئیاں معلومات نوں لیک کیتا جائے۔ یاد رہوے کہ روسی حکام ہیکنگ دے الزاماں نوں کئی وار رَد کر چکے نیں۔
