واشنگٹن(پاکستان پوائنٹ نیوز15۔نومبر۔2016ء) نویں چُنے گئے امریکی صدر ڈونلڈ ٹرمپ خلاف جاری احتجاجی وکھالویاں وچ دو امریکی ریاستاں کیلی فورنیا تے میری لینڈ دے پڑھیار وی شامل ہو گئے۔ امریکی ابلاغ وسیلیاں دے مطابق کیلی فورنیا دے شہر لاس اینجلس تے میری لینڈ وچ کئی سکولاں دے پڑھیاراں نے کلاساں دا بائیکاٹ کر کے نویں چُنے گئے صدر خلاف جلوس کڈھے تے ایس دوران پڑھیاراں نے ڈونلڈ ٹرمپ دی امریکا وچ رہن والے پر واسیاں بارے پالیسی نوں ڈاڈھی تنقید دا نشانا بنایا۔
اوہناں نے آکھیا کہ احتجاجی وکھالیاں دا اک مقصد امریکا وچ رہن والیاں اقلیتاں نوں پیغام دینا وی اے کہ اوہ امریکی لوکائی نال کھلوتے نیں۔ پڑھیاراں نے ٹرمپ ساڈا صدر نہیں تے پر واسیاں نوں جی آیاں ورگے نعرے لائے۔ ایہناں احتجاجی وکھالیاں دے بعد امریکا دیاں کئی ریاستاں دے پڑھیاراں نے وی نویں چُنے گئے صدر خلاف احتجاج دا اعلان کیتا اے۔
