برمی فوجی دی مسلماناں دی نسل کشی لئی اک ہور کارروائی: روہنجیا مسلماناں دے اک پنڈ وچ سوانیاں تے بالاں سنے 25بندیاں نوں شہید کر دِتا

برمی فوجی دی مسلماناں دی نسل کشی لئی اک ہور کارروائی: روہنجیا مسلماناں دے اک پنڈ وچ سوانیاں تے بالاں سنے 25بندیاں نوں شہید کر دِتا

برما(پاکستان پوائنٹ نیوز14۔نومبر۔2016ء) برمی فوج نے مسلماناں دی نسل کشی دا سلسلا اک وار فیر شروع کر دِتا اے ۔ تفصیل دے مطابق برما دی فوج نے ریاست رخائن وچ اوہناں پنڈاں اُتے گن شپ ہیلی کاپٹراں نال فائرنگ کیتی جتھے روہنجیا مسلم رہندے نیں۔ ایس حوالے نال میانمر دی فوج دا کہنا اے کہ مارے جان والے لوکاں دے ہتھاں وچ چاکو تے سوٹیاں سن جس پاروں اوہناں اُتے گن شپ ہیلی کاپٹراں دے ذریعے حملا کیتا گیا۔

سوشل میڈیا اُتے آن والیاں تصویراں تے وڈیوز وچ ویکھیا جا سکدا اے کہ مرن والیاں وچ سوانیاں تے بال وی شامل نیں۔ ایس کارروائی پاروں سینکرے بندیاں نے نقل مکانی وی شروع کر دِتی اے، ریاست رخائن وچ کسے آزاد میڈیا نوں رسائی حاصل نہیں اے ایس لئی کسے وی سرکاری بیان نوں ڈاڈھی تنقید دا نشانا بنایا جا رہیا اے۔ برما دے سرکاری میڈیا دے مطابق روہنجیا مسلماناں نے 130گھراں نوں ساڑ کے غلط فہمی پیدا کیتی تاں جے بین الاقوامی امداد حاصل کیتی جاسکے۔

ایس توں پہلے سرکاری میڈیا دا کہنا اے کہ فوجی قافلے اُتے حملے دے بعد ہون والے جھیڑے وچ دو فوجی تے چھ حملا آور ہلاک ہو گئے نیں۔ اطلاع دے مطابق رخائن دے علاقے وچ کجھ پنڈاں نوں ساڑیا وی گیا اے۔ انسانی حقاں دے ادارے ہیومن رائٹس واچ ولوں جاری کیتیاں گئیاں تصویراں وچ سڑے ہوئے پنڈ وکھائے گئے نیں۔ ہیومن رائٹس واچ دا کہنا اے کہ ایس علاقے وچ 430بلڈنگاں نوں ساڑیا گیا۔

پچھلے مہینے جھڑپاں تے عام شہریاں توں ملن والیاں اطلاعواں دے بعد مواصلاتی سیارے دے ذریعے ایہ تصویر 22اکتوبر تے 10نومبر دی وچکارلی رات لِتیاں گئیاں نیں۔ روہنجیا کارکناں دا کہنا اے کہ حکومت اک منصوبے دے تحت مسلمان اقلیت نوں اپنے پنڈاں توں نکلن اُتے مجبور کر رہی اے۔ برطانوی نشریاتی ادارے دے برما وچ نمائندے دا کہنا اے کہ روہنجیا مسلماناں اُتے حملے کرنا فوج دا اک مشہور کم اے۔

پرچا کار دا کہنا اے کہ روہنجیا مسلماناں نوں برمی آبادی ول وڈی پیمانے اُتے ناپسند کیتا جاندا اے جو اوہناں نوں بنگلا دیش توں آئے ہوئے پرواسی سمجھدے نیں۔ یاد رہوے کہ جھڑپاں دا تازا سلسلا اک مہینہ پہلے تن پولیس چوکیاں اُتے حملیاں دے بعد شروع ہویا۔ برما دی حکومت آزاد میڈیا نوں رخائن وچ جان دی اجازت نہیں دے رہی جس پاروں وڈے پیمانے اُتے ہون والی لڑائی دے ایہناں دعویاں دی تصدیق کرنا مشکل اے۔