لندن(پاکستان پوائنٹ نیوز12۔نومبر۔2016ء) سماجی رابطے دی مشہور ویب سائٹ فیس بک اُتے اک غیر معمولی بگ نے تھوڑے ای چِر لئی اوہدے کئی ورتیندڑاں نوں مردا قرار دے دِتا جدکہ ایہناں بندیاں وچ فیس بک دے بانی مارک زکر برگ وی شامل نیں۔ برطانوی نشریاتی ادارے دی رپورٹ دے مطابق پچھلے دیہاڑے فیس بک دے کئی ایسے ورتیندڑاں دی پروفائلز اُتے میوریئل بینر پوسٹ کر دِتا جو اجے تیکر زندا نیں۔
بھاویں فیس بک ولوں ایس خرابی بارے پیغام جاری کیتا گیا سی پر کئی ورتیندڑاں نے اپنے دوستاں تے خاندان والیاں نوں ایہ یقین دوان لئی کہ اوہ زندا نیں اپنا فیس بک سٹیٹس اپ ڈیٹ کیتا۔ فیس بک دے اک ترجمان دا ایس حوالے نال کہنا سی کہ ایہ اک خوفناک خرابی سی جہنوں ٹھیک کر دِتا گیا اے۔ اوہناں نے آکھیا کہ اسیں معذرت چاہندے آں کہ ایہ خرابی پیداہوئی۔
یاد رہوے کہ میموریئل بینر یادگاری پروفئلز لئی بنایا گیا سی پر غلطی نال وڈی گنتی وچ لوکاں دی پروفائلز اُتے ظاہر ہو گیا تے اوہناں وچ آپ فیس بک دے بانی زکر برگ وی شامل نیں۔ اوہناں دے صفحے اُتے پوسٹ کیتے گئے بینر دے مطابق ’سانوں امید اے کہ مارک زکر برگ نال محبت کرن والے اوہناں شیواں وچ چین پان گے جہناں نوں اوہناں نے شیئر کیتا سی۔‘ ایس سارے واقعے نال ٹیکنالوجی رپوٹرز تے فیس بک ورتیندڑاں نوں مزاح دا پہلو وی مل گیا۔ نیویارک ٹائمز دی کیٹی راجر دا کہنا سی ’ایہ فیس بک کیوں آکھ رہیا اے کہ میں مر گئی آں، میں یقینن مری نہیں آں، کیہ میں مر گئی آں، ایہ ہفتا بہت مصروف سی۔‘
