نیویارک(پاکستان پوائنٹ نیوز11۔نومبر۔2016ء) بھارتی نژاد امریکیاں نال رابطے لئی ڈونلڈ ٹرمپ دے نمائندے شلبھ کمار نے آکھیا اے کہ امریکا دے نویں چُنے گئے صدر ڈونلڈٹرمپ تے بھارتی وزیراعظم نریندر مودی وچکار بہت قریبی تعلقات ہون گے۔ غیر ملکی خبر رساں ادارے نوں انٹرویو وچ شلبھ کمار نے آکھیا کہ صرف دوویں ملکاں دے سربراہ ای نہیں بلکہ دوویں ملکاں دی لوکائی وی بہت قریب ہو جاوے گے۔
اوہناں نے آکھیا کہ میرے ذریعے ڈونلڈ ٹرمپ نریندر مودی بارے جاندے نیں تے اوہ ہور جاننا چاہندے نیں۔ پاکستان دے حوالے نال شلبھ کمار نے آکھیا کہ ڈونلڈ ٹرمپ اوہ پہلے امریکی صدر نیں جہناں نے سرحد پار دہشت گردی دی گل کیتی اے جدکہ انج کر کے اوہناں نے بھارت دے ایس الزام نوں منیا لیا اے کہ پاکستان دہشت گردی نوں فروغ دے رہیا اے، میں اوہناں توں امید کرنا واں کہ اوہ بھارت ولوں پاکستان وچ سرجیکل حملیاں دی حمایت کرن گے تے اوہ بنیاد پرست مسلماناں خلاف جنگ وچ بھارت نوں اپنا دوست ویکھن گے۔
بھارت تے امریکا دے تجارتی تعلقات اُتے گل بات کردے ہوئے اوہناں دا کہنا سی کہ مینوں یقین اے کہ امریکا تے بھارت وچکار تجارت وچ وادھا ہوووے گا، مینوں امید اے کہ آن والے دو ورھیاں وچ دوویں ملکاں وچکار تجارت دا کھلار 250ارب ڈالر تیک پہنچ جائے گا۔
