واشنگٹن(پاکستان پوائنٹ نیوز10۔نومبر۔2016ء) ڈونلڈ ٹرمپ 3.7ارب ڈالر اثاثیاں نال امیر ترین امریکی صدر۔ پچھلے تن دہاکیاں دے دوران اوہ 3500مقدمیاں وچ ملوث رہے، ٹرمپ دے والد دا تعلق جرمنی توں سی جدکہ ماں سکاٹش سی، ٹرمپ نے زندگی وچ کدی شراب یاں سگریٹ نہیں پیتا۔ غیر ملکی خبر رساں ادارے دی رپورٹ دے مطابق ڈونلڈ ٹرمپ 3.7ارب ڈالر اثاثیاں نال امریکی تواریخ دا امیر ترین سربراہ اے۔
مشہور امریکی میڈیا ہاﺅس دے مطابق ٹرمپ دنیا دے امیر ترین بندیاں دی لسٹ وچ 324ویں نمبر اُتے اے جدکہ امریکا دے امیر ترین بندیاں وچ اوہناں دا 156واںنمبر اے۔ اوہناں دی ملکیت وچ 18گالف کورسز نیں، ایس توں وکھ ”ٹرمپ آرگنائزیشن“ دے اوہ صدر وی نیں۔ نیویارک وچ پیدا ہون والے ٹرمپ نے معاشیات وچ 1968وچ گریجویشن کیتا سی، جہدے بعد اوہ اپنے والد دے رئیل سٹیٹ دے کاروبار نال جُڑ گئے۔
امریکی فیڈرل الیکشن کمیشن وچ اپنے مالی اثاثیاں دیاں تفصیلاں دَسدے ہوئے اوہناں نے آکھیا سی کہ اوہناں دے 2015وچ آمدنی دے وسیلے تقریبن 38کروڑ 20لکھ ڈالر سن۔ اوہ این بی سی ٹی وی نیٹ ورک سی سی نال 2004توں 2015تیک ”دا اپریٹس“ نامی ٹی وی سیریز دے معاون پروڈیوسر تے میزبان وی رہے نیں۔ عمر دے لحاظ نال اوہ امریکا دے سبھ توں ودھ عمر وچ صدر بنن والے بندے نیں۔
اوہناں دی تاریخ پیدائش 14جون 1946اے، ایس لحاظ نال ڈونلڈ ٹرمپ 70ورھے، 4مہینے تے 25دناں وچ امریکی صدر چُنے گئے نیں ۔ ایس توں پہلے رونلڈ رینگ 69ورھے 349دناں وچ امریکی صدر بنے سن۔ جون 2016وچ مشہور امریکی روزنامے نے انکشاف کیتا سی کہ پچھلے تن دہاکیاں دے دوران ٹرمپ تے اوہناں دے کاروبار اُتے وفاقی تے ریاستی عدالتاں وچ 3500قانونی مقدمے قائم ہوئے۔
