نیویارک(پاکستان پوائنٹ نیوز09۔نومبر۔2016ء) امریکی صدارتی الیکشن وچ ڈونلڈ ٹرمپ نے ہیلری کلنٹن نوں ہرا دِتا۔ نویں چُنے گئے امریکی صدر نے الیکشن ہیڈ کوارٹر پہنچ کے اپنے حامیاں دا شکریا ادا کیتا ۔ایس موقعے اُتے ڈونلڈ ٹرمپ دا اپنے خطاب وچ کہنا سی کہ میرے کامیاب ہون اُتے ہیلری کلنٹن نے مینوں فون کیتا تے مینوں میری جِت اُتے مبارکباد دِتی۔ اوہناں نے آکھیا کہ میں سارے ملک لئی ہیلری دیاں خدمتاں نوں سلاہنا واں۔
اوہناں نے دسیا کہ ٹیلی فونک رابطے وچ میں ہیلری نوں زبردست انتخابی مہم چلان اُتے مبارکباد دِتی۔ ہیلری کلنٹن نے امریکالئی بہت کم کیتا اے۔ اوہناں دا کہنا سی کہ میں ساریاں نوں نال لے ٹُراں گا، مینوں ووٹ نہ دین والیاں دی رہنمائی وی اہمیت جوگ ہووے گی، اسیں سارے رلکے ملکی ترقی لئی کم کراں گے، لوکائی دی حمایت تے رائے نال ای ملکی ترقی لئی کم کیتا جائے گا۔
ڈونلڈ ٹرمپ نے آکھیا کہ میری پوری زندگی کاروبار وچ لنگھی، اسیں ملکی معیشت نوں وی مستحکم کراں گے۔ اوہناں دا کہنا سی کہ میں ملک وچ سکول، ہسپتال تے سڑکاں بناواں گا، ریٹائرڈ فوجیاں دا اُچیچا خیال رکھاں گا، اسیں امریکن نوں دوبار بناواں گے۔ اوہناں نے آکھیا کہ میں وعدا کرنا واں کہ سارے امریکیاں دا صدر بناں گا، ساریاں نوں آکھاں گا ملک لئی اکٹھے ہو جاﺅ، اسیں اپنیاں عظیم روایتاں دی وی حفاظت کراں گے۔
اوہناں دا کہنا سی کہ میں بغیر رنگ و نسل امریکیاں دی خدمت کراں گا۔ ٹرمپ دا کہنا سی کہ کوئی خاب، کوئی چیلنج اینا وڈا نہیں ہوندا سارا کُجھ حاصل کیتا جا سکدا اے۔ ڈونلڈ نے آکھیا کہ دنیا دے سارے ملکاں نال چنگے تعلقات رکھنا چاہندے آں، دنیا نوں دسنا چاہنا واں کہ امریکا دا مفاد پہلی ترجیح ہووے گی۔ اوہناں دا کہنا سی کہ ملکی معیشت نوں مستحکم کیتا جائے گا، معیشت نوں بہتر کر کے جی ڈی پی ودھاواں گے، ترقی لئی معاشی پیداوار نوں دوگنا کراں گے۔
اوہناں دا کہنا سی کہ صدارتی انتخابات لئی چلائی گئی مہم مشکل سی۔ ایس توں وکھ اپنے خطاب وچ ٹرمپ نے اپنے ماں پیو، دوستاں تے گھر والی سنے اپنے بالاں دا وی شکریا ادا کیتا، اوہناں دا کہنا سی کہ میں اوہناں ساریاں لوکاں دا وی شکریا ادا کرنا واں جہناں میرا ساتھ دِتا۔
