نویں دِلی(پاکستان پوائنٹ نیوز27۔ستمبر۔2018ء) بھارتی ائر فورس دے وائس چیف ائر مارشل نے اپنے آپ نوں گولی مارلی۔ سریش دیو نے غلطی نال اپنے آپ نوں گولی ماری، سریش دی حالت ہن خطرے توں باہر اے۔ تفصیل مطابق بھارتی فوج دی ماڑی حالت لمے چِر توں خبراں دی زینت بنی ہوئی اے۔ ماڑے حالات کارن بھارتی فوجی یاں تے نوکریاں چھڈ رہے نیں یاں اوہ خدکشی کر کے اپنی زندگی دی ڈور کٹ رہے نیں۔
بھارتی میڈیا مطابق پچھلے ورھے درجناں دے حساب نال بھارتی فوجیاں نے خدکشی کیتی سی۔ پر ایس حوالے نال تازہ ترین خبر ایہ اے کہ بھارتی ائر فورس دے وائس چیف ائر مارشل سریش دیو نے وی اپنے آپ نوں گولی مار کے زخمی کر لیا اے۔ وسیلیاں مطابق وائس چیف ائر مارشل سریش دیو نے غلطی نال اپنے آپ نوں گولی ماری تے اوہدے مگروں اوہناں نوں زخمی ہون مگروں دِلی وچ موجود ہسپتال اپڑایا گیا۔
ہسپتال وچ اوہناں دی سرجری وی کیتی گئی تے ہن ڈاکٹراں مطابق اوہناں دی حالت پہلے توں بہتر اے تے خطرے توں باہر اے۔ ڈاکٹراں ولوں اوہناں نوں آرام کرن دی صلاح دتی گئی اے۔ ڈاکٹراں ولوں آس کیتی جا رہی اے کہ وائس چیف ائر مارشل سریش دیو چھیتی ٹھیک ہو جان گے۔ یاد رہوے کہ وائس چیف ائر مارشل سریش دیو نے پچھلے مہینے وائس چیف ائر مارشل دے عہدے اُتے بی ایس دھنووا دی تھاں سنبھالی سی جو ہن بھارتی ائر فورس دے سربراہ نیں۔
