بھارت(پاکستان پوائنٹ نیوز03۔ستمبر۔2018ء) بھارتی ریاست مدھیہ پردیش وچ کرائے اُتے بیوی لین دی پیشکش کر دتی گئی اے۔ مدھیہ پردیش دے اک پنڈ وچ ایہ آفر صرف امیر تے ’اُچی‘ ذات دے لوکاں لئی متعارف کروائی گئی اے۔ مدھیہ پردیش دے اک پنڈ وچ امیر تے اُچی ذات دے لوک سوانیاں نوں ’بطور بیوی‘ کرائے اُتے لے سکدے نیں ۔ بھاویں کوئی بندہ اک مہینے لئی کرائے اُتے بیوی لوے یاں فیر اک سال لئی۔
سوانی کرائے اُتے دین لئی شیو پوری، جو مدھیہ پردیش دا ضلع اے،وچ باقاعدہ طور اُتے اک سمجھوتا کیتا جاندا اے۔ ایہ سمجھوتا 10رُپئے توں 100رُپئے تیکر دے سٹامپ پیپر اُتے کیتا جاندا اے۔ جیہدے وچ سوانی نوں کرائے اُتے لین دی شرط طے کیتی جاندی اے۔ کئی مرد سوانیاں دا تبالا وی کر لیندے نیں، جیہدے لئی اوس پنڈ وچ باقاعدہ طور اُتے اک بازار سجایا جاندا اے جتھے کُڑیاں تے سوانیاں نوں گاہکاں ساہمنے پیش کیتا جاندا اے، اوہ گھنٹیاں دے حساب نال کھلوتیاں رہندیاں نیں، گاہک آؤندے نیں تے بازار وچ سجائیاں گئیاں سوانیاں دا جائزہ لیندے نیں جیویں اوہ جنور ہون۔
جس مرد نوں جو کُڑی پسند آؤندی اے اوہدا بھیڈ بکریاں وانگ بھاء طے کیتا جاندا اے، جیہدے مگروں اوہ کُڑی یاں سوانی کرائے دی بیوی دے طور اُتے چلی جاندی اے۔ سمجھوتے دی مدت پوری ہون مگروں اوہ سوانی اک وار فیر کرائے لئی دستیاب ہوندی اے۔ بھارت وچ ایہ مندا کاروبار صرف مدھیہ پردیش تیکر ای نہیں بلکہ بھارت دی مغربی ریاست گجرات تیکر کھلریا ہویا اے۔ ایتھے اعلا ذات دیاں برادریاں وچ سوانیاں دی کمی دی وجہ توں جو لوک ویاہ نہیں کر سکدے اوہ کرائے دیاں بیویاں نال گزارہ کردے نیں۔ایس توں وکھ سوانیاں دی ویچ وٹک(خرید وفروخت)وی کیتی جاندی اے۔کئی سوانیاں گھریلو مسئلیاں تے غربت پاروں وی انج کردیاں نیں۔
