بیجنگ( پاکستان پوائنٹ نیوز27۔جولائی۔2018ء ) چین نے پاکستان دے عام انتخابات مگروں بنن والی حکومت نال رلکے کم کرن دا اعلان کیتا اے ۔ پاک چین اقتصادی راہداری (سی پیک) دا منصوبہ کسے وی طرحاں تعطل دا شکار نہیں ہوئے گا۔ چین دی وزارت خارجا دے ترجمان نے ایہ گل پاکستان دے عام انتخابات نوں مُکھ رکھدے ہوئے آؤندی پاکستانی حکومت دے دوروچ پاک چین تعلقات تے سی پیک منصوبیاں بارے پُچھے گئے اک سوال دے جواب وچ آکھی۔
پیر نوں بیجنگ وچ چینی وزارت خارجا دی نیوز بریفنگ دوران جدوں ترجمان ، گینگ شوانگ نال پاکستان دی اک اہم سیاسی جماعت تحریک انصاف دے رہنما عمران خان دے سی پیک دے منصوبیاں دی شفافیت بارے پہلاں جیہڑے تحفظات دا ذکر کیتا گیا سی، اوہناں بارے سوال کردے ہوئے ترجمان توں پُچھیا کہ چین انتخابات مگروں بنن والی پاکستانی حکومت نال کیویں معاملات طے کرے گا۔
عمران خان دا ذکر کیتے بغیر ، چینی وزارت خارجا دے ترجمان شوانگ نے آکھیا کہ چین پاکستان اقتصادی راہداری دا منصوبہ اسلام آباد تے بیجنگ وچکار سٹرٹیجک تعاون دا اک فریم ورک اے، جو دوویں ملکاں دی قیادت نے لمی مدت دی ترقی دے نشانے نوں مُکھ رکھدے ہوئے وضع کیتا۔ بقول اوہناں دے چین پاکستان وچ عام انتخابات مگروں قائم ہون والی حکومت نال تعاون ودھان نوں فروغ دینا جاری رکھے گا تے پاکستان وچ جاری سی پیک دے منصوبے تعطل دا شکار نہیں ہون گے۔
