نویں دِلی(پاکستان پوائنٹ نیوز19۔مئی2018ء ) بھارت نے پاکستان وچ تعینات اپنی ای سفارتکار نوں جاسوس قرار دے دتا۔ بھارتی ٹی وی مطابق پچھلے دیہاڑے نویں دِلی دی عدالت نے جاسوسی کیس دا فیصلا سُناندے ہوئے قرار دتا کہ اسلام آباد وچ بھارتی ہائی کمیشن اندر تعینات رہن والی سفارتکار مادھوری گپتا نے ملک دیاں خُفیہ دستاویزات پاکستان نوں دتیاں۔ ایڈیشنل سیشن جج سدھارتھ شرما مطابق مادھوی گپتا اسلام آباد وچ اپنی تعیناتی دوران دفاع، وزارت داخلا تے بھارتی ہائی کمیشن وچ تعینات اہم افسراں تے اوہناں دے خانداں بارے تفصیلاں پاکستان دیاں خفیہ ایجنسیاں نوں دیندیاں رہیاں نیں، جیہدی وجہ توں اوہناں افسراں نوں خطرے ہو سکدے سن۔
مادھوری گپتا 8سال پہلے اسلام آباد وچ بھارتی ہائی کمیشن اندر سکینڈ سیکرٹری پریس اینڈ انفارمیشن دے عہدے اُتے تعینات سن۔ بھارتی میڈیا مطابق ایس دوران اوہناں دی دوستی پاکستانی آفیشلز مبشر رضا رانا تے جمشید نال ہو گئی۔ دسیا جاندا اے کہ جمشید نال اوہناں نوں محبت سی تے اوہ اک مقامی پرچا کار راہیں اوہناں نوں بھارتی خفیہ معلومات دیندیاں رہیاں۔ مادھوری گپتا نوں دلی پولیس دے سپیشل سیل نے 22اپریل 2010نوں آفیشل سیکریٹ ایکٹ دے تحت گرفتار کیتا سی۔
