واشنگٹن(پاکستان پوائنٹ نیوز18۔مئی2018ء ) پینٹا گون چیف دی ترجمان ڈانا ڈبلیو وائٹ نے آکھیا اے کہ پاکستان اکو ای ویلے دہشت گردی توں متاثرہ ملک تے اوہدا سپانسر اے جو علاقائی سکیورٹی لئی بہت کُجھ کر سکدا اے۔ ڈانا ڈبلیو وائٹ نے ایہ گل میڈیا بریفنگ دوران افغانستان ولوں پاکستان اُتے ملک اندر حملیاں وچ ملوث ہون دا الزام لان بارے سوال دے جواب وچ آکھی۔
اوہناں دا کہنا سی کہ ساڈا خیال اے کہ علاقائی سکیورٹی بارے پاکستان یقینن ہور بہت کُجھ کر سکدا اے۔ اسیں دوویں ملکاں ول ویکھ رہے آں تے آس کردے آں کہ پاکستان تے افغانستان ساڈی مدد کرن گے،کیونکہ دوویں دہشت گردی توں متاثرہ ملک نیں تے دوواں نے دہشت گردی نوں فروغ وی دتا اے، ایس لئی اسیں پاکستان ول ویکھ رہے آں کہ اوہ خطے دی سکیورٹی لئی ہور موقعے پیدا کرے۔ سابق وزیر اعظم نواز شریف دے غیر ریاستی عناصر دے ممبئی حملیاں بارے بیان دے حوالے نال اوہناں نے آکھیا کہ پاکستان نے فیصلے کرنے نیں تے سانوں آس اے کہ اوہ خطے دی حفاظت وچ ساڈا پارٹنر ہوئے گا۔
