مکہ مکرمہ وچ دفن ہونا چاہنا واں، کینسر دے روگی دی خاہش

مکہ مکرمہ وچ دفن ہونا چاہنا واں، کینسر دے روگی دی خاہش

جدہ(پاکستان پوائنٹ نیوز23۔اپریل2018ء) سعودی عالمی پشتو نشریات دے سربراہ عبدالودود خان نے دسیا اے کہ افغانستان دے اک شہری شھپوریا سینی مومنت نے علاج دوران دعا منگی کہ مینوں مکہ مکرمہ وچ دفن ہونا نصیب ہو جائے۔ میڈیا رپورٹ مطابق شھپوریا سینی مومنت تقریبن چار ورھیاں توں کینسر دے روگ دا شکارسی تے اوہدا ترکی وچ علاج جاری سی۔ عمرے دے ویزہ لوان لئی اوہدا پاسپورٹ افغانستان گھل کے لوایا گیا۔

اوہ ترکی توں اپنے اک پُتر شاپور سجاد نال جدہ اپڑیا جتھے اوہدے وکیل پُتر انور نے اوہدا استقبال کیتا۔ اوہ عمرے دی نیت نال مکہ مکرمہ اپڑیا پر ہفتے تے ایتوار دی رات چلانا کر گیا۔ ایتوار نوں عشاء مگروں حرم شریف وچ اوہدا جنازہ پڑھیا گیا،جیہدے مگروں اوہنوں جنت معلی وچ دفن کیتا گیا۔ شھپوریا سینی مومنت دا تعلق افغانستان دے صوبے ننگر ہار دے ضلع کامہ توں سی۔ اوہ 1961وچ پیدا ہویا ۔ اوہدی شروع توں ای ایہو دعا سی کہ اوہنوں مکہ مکرمہ وچ دفن ہونا نصیب ہو جائے۔ آخیر اوہدی ایہ دعا قبول ہو گئی۔