جاپان وچ غیر ملکی کارکناں لئی نواں منصوبہ تیار، غیر ملکی بندیاں نوں کم دی اجازت ہوئے گی

جاپان وچ غیر ملکی کارکناں لئی نواں منصوبہ تیار، غیر ملکی بندیاں نوں کم دی اجازت ہوئے گی

ٹوکیو(پاکستان پوائنٹ نیوز13۔اپریل2018ء) جاپان وچ کم کرن والے بندیاں دی تھوڑ پیدا ہو گئی اے۔ ایس مسئلے نال نبڑن لئی حکومت نے اک نواں منصوبہ بنایا اے۔ جیہدے تحت کئی غیر ملکی بندیاں نوں ملک وچ داخلے تے کم کرن دی اجازت ہوئے گی۔ ایس ویلے جاپان وچ غیر ملکی کارکناں لئی دو قسم دے ویزے نیں۔ اک قسم پیشہ ور بندیاں دی اے ۔ جیہناں وچ پروفیسر، ڈاکٹر تے وکیل شامل نیں۔

ویزے دی دوجی قسم تکنیکی تربیت لین والے بندیاں لئی اے۔ ذکر کیتے گئے منصوبے تحت کُجھ خاص قسماں دے ہنر مند غیر ملکیاں نوں جاپان وچ 5سال کم کرن دی اجازت دتی جائے گی۔ تربیت مکمل کرن والے بندے وی اپنے گھر والیاں نوں جاپان نہ لیان دی شرط اُتے ایس قسم دا ویزا لے سکن گے۔ حکومت اجیہے بندیاں نوں ملازمت دین والیاں کمپنیاں نوں پابند کرے گی کہ اوہ اوہناں لئی رہائش حاصل کرن وچ تعاون دی منصوبہ بندی کرن۔ کمپنیاں نوں ایس سلسلے وچ اپنے منصوبے وزارت انصاف نوں پیش کرنے ہون گے۔