بیجنگ(پاکستان پوائنٹ نیوز22۔مارچ2018ء) چین نے پاکستان دے میزائل پروگرام نوں ہور بہتر بنان لئی نواں ٹریکنگ سسٹم دے دتا۔ ساؤتھ چائنا مارننگ پوسٹ اخبار مطابق چین نے پاکستان دے میزائل پروگرام لئی نواں ٹریکنگ سسٹم ویچیا اے جیہدی مدد نال ملٹی وار ہیڈ میزائلز دی تیاری دی سپیڈ تیز کیتی جا سکدی اے۔ نویں چینی ٹریکنگ سسٹم دی مدد نال پاکستان لئی دشمن دے کئی شہراں تے فوجی ٹھکانیاں نوں اِکو ویلے نشانہ بنا نا ممکن ہوئے گا۔
چینی حکومت نے خفیہ معلومات نوں عام کیتا اے، تفصیلاں توں ایس غیر معمولی میزائل سودے دیاں تفصیلاں ساہمنے آئیاں۔ چائنیز اکیڈمی آف سائنسز( سی اے ایس) ولوں جاری تفصیلاں مطابق چین ایہ حساس ٹیکنالوجی پاکستان نوں دین والا پہلا ملک اے۔ پر ایہ گل ساہمنے نہیں آ سکی کہ پاکستان نے کِنے پیسیاں وچ ایہ سسٹم مُل لیا اے۔ چینی سائنس دان ژینگ مینگوائی نے تصدیق کیتی کہ پاکستان نے چین توں بہت جدید تے وڈا آپٹیکل ٹریکنگ سسٹم لیا اے۔
