استنبول(پاکستان پوائنٹ نیوز22۔مارچ2018ء) ترکی نے 57اسلامی ملکاں نوں رلاکے دنیا دی سبھ توں وڈی فوج بنان دا فیصلا کر لیا اے ، فوج بنان دا مقصد پتا لگن اُتے امریکا تے اسرائیل دے ہوش اُڈ جان گے۔ ترک اخبار نے انکشاف کردے ہوئے رپورٹ چھاپی اے کہ ترکی نے 57اسلامی ملکاں نوں نال رلاکے دنیا دی سبھ توں وڈی فوج بنان دا فیصلا کرلیا اے۔ رپورٹ وچ واضح کیتا گیا اے کہ دنیا بھر دی ایس سبھ توں وڈی فوج دا ناں ’اسلامی فوج‘ رکھیا جائے گا تے اسرائیل خلاف بنائی جان والی ایس فوج دی گنتی 50لکھ ہوئے گی۔
اخبار مطابق اسلامی تعاون تنظیم دے 57رکن ملکاں توں مطالبہ کیتا گیا اے کہ اوہ اجیہی وڈی فوج بنان جو اسرائیل دا گھیرا کرکے اوہدے اُتے حملا کرے۔ رپورٹ وچ اسرائیل تے او آئی سی دے رکن ملکاں دی طاقت دا موازنہ کردے ہوئے لکھیا گیا اے کہ او آئی سی دے رکن ملکاں دی آبادی اک ارب 67کروڑ 45لکھ 26ہزار 931اے جدکہ اوہناں ملکاں دی متحرک فوج دی گنتی 52لکھ اے تے اوہناں دا دفاعی بجٹ 174ارب 70کروڑ ڈالر اے۔
ایہدے مقابلے وچ پورے اسرائیل دی آبادی 80لکھ 49ہزار 314اے ۔ ایہدے اُلٹ ترکی دے اک شہر استنبول دی آبادی ای 1کروڑ 40لکھ اے۔ دوجے پاسے اسرائیل دی متحرک فوج دی گنتی صرف 1لکھ 60ہزار اے تے اوہدا دفاعی بجٹ 15ارب60کرور ڈالر (تقریبن15کھرب 60ارب رُپئے) اے۔ آنکڑیاں نوں ویکھدے ہوئے جے او آئی سی دے رکن ملک فوج بنان لئی راضی ہو جان تے ایہ فوج اسرائیلی فوج توں کیتے بُہتی طاقتور ہوئے گی۔
