کابل(پاکستان پوائنٹ نیوز16۔مارچ2018ء) افغانستان وچ طالبان ہتھوں اغوا ہون والے بندے نے اغوا کاراں دے نماز پڑھن ویلے اوہناں دی بندوق چوری کر لئی تے فائرنگ کر کے 7طالبان نوں ہلاک تے 18نوں زخمی کر کے اپنے آپ نوں ڈرامائی طریقے نال رہا کروا لیا۔ غیر ملکی خبر رساں ادارے مطابق مشرقی صوبے پکتیکا دے ڈپٹی سکیورٹی چیف عبدالرؤف مسعود نے دسیا کہ اول خان تے مقامی پولیس افسر نوں بدھ دے دیہاڑے اغوا کر لیا گیا سی۔
پکتیکا پاکستانی سرحد نال جُڑیا علاقہ اے جتھے طالبان دا قبضہ اے۔ پولیس افسر نوں ہلاک کر دتا گیا جدکہ 36ورھیاں دے اول خان نوں ضلع گومل وچ طالبان دے کمپاؤنڈ لے جایا گیا، جتھے اوہناں نوں کئی گھنٹے رکھیا گیا۔عبدالرؤف مسعود دا کہنا سی کہ ظہر دی نماز دوران ہتھکڑیاں لگے اول خان نے اغوا کاراں وچوں اک دی بندوق چوری کیتی تے فائرنگ کر دتی۔ صوبائی گورنر دے ترجمان محمد رحمان ایاز نے دسیا کہ اول خان دی فائرنگ نال 7طالبان ہلاک تے 18زخمی ہوئے۔ محمد رحمان ایاز دا کہنا سی کہ طالبان دی قید توں آزا د ہون مگروں اول خان اغوا کاراں دی پک اپ وچ فرار ہو گیا۔ اوہناں دے بھرا تے مقامی پولیس کمانڈر نے انتظامیہ نوں واقعے دیاں تفصیلاں دسیاں۔
