ریاض(پاکستان پوائنٹ نیوز15۔مارچ2018ء) سعودی ولی عہد شہزادہ محمد بن سلمان نے آکھیا اے کہ جے ایران نے ایٹم بمب بنایا تے اسیں پچھانہ نہیں رہواں گے۔ اوہناں نے امریکی میڈیا نوں انٹرویو دیندے ہوئے آکھیا کہ سعودی عرب ایٹمی ہتھیار رکھن تے بنان وچ دلچسپی نہیں رکھدا۔ اوہناں نے آکھیا کہ جے ایران نے ایٹم بمب تیار کیتا تے سعودی عرب وی پچھانہ نہیں رہوے گا۔
ایس توں وکھ سعودی نشریاتی ادارے مطابق سعودی کابینہ نے ایٹمی توانائی پروگرام دی قومی پالیسی منظور کر لئی اے۔ سعودی عرب اپنے پہلے ایٹمی بجلی گھر لئی سمجھوتے دی تیاری کر رہیا اے۔ ایہ پالیسی ایٹمی پروگرام نوں پرامن مقصداں لئی محدود کرن، ریڈیائی فاضل مادے نوں ٹھکانے لان دے بہترین اقدامات کرن تے حفاظتی اقدامات اُتے زور دیندی اے۔ چیتے رہوے کہ سعودی عرب معدنی تیل برآمد کرن والے وڈے ملکاں وچ شامل اے پر اوہ ہن تیل دی درآمد وچ وادھے لئی بجلی پیدا کرن دے دوجے وسیلے وی لبھ رہیا اے۔ ایس پالیسی دا اعلان ولی عہد محمد بن سلمان دے دورہ امریکا دے کُجھ دن پہلے ساہمنے آیا اے۔ محمد بن سلمان 19توں 22مارچ تیکر امریکا دا دورہ کر رہے نیں۔
