بھارت(پاکستان پوائنٹ نیوز12۔فروری2018ء) ہندو مسلم اختلافات بارے تے اکثر ای تہانوں خبراں سُنن نوں ملدیاں نیں پر مسلمان خاندان نے پچھلے دنا ای انسانی تے مذہبی ہم آہنگی دی مثال اوس ویلے قائم کیتی جدوں اوہناں نے گودی لئے ہندو بال دے ویاہ دیاں رسماں ہندو رواج دے مطابق ادا کیتیاں۔ محی الدین نامی اک مسلمان بندے دے خاندان نے 12سال دی عمر دے اک ہندو راکیش رستوگی ناں دے مُنڈے نوں گود لیا پر کدی مذہبی اختلاف دی وجہ توں اوہدے نال مندا سلوک نہیں کیتا۔
جدوں ویاہ دا ویلا آیا تے محی الدین تے اوہناں خاندان نے راکیش رستوگی دا ویاہ ہندو رسماں دے مطابق کیتا جدکہ محی الدین دی گھر والی کوثر نے اپنی نوہ دا استقبال وی ہندو رسماں مطابق ای کیتا۔ میڈیا نال گل بات کردے ہوئے راکیش نے آکھیا کہ اوہنوں کدی احساس ای نہیں ہویا کہ اوہ اک مسلمان خاندان نال رہ رہیا اے۔ راکیش دا کہنا سی کہ کسے میری عبادت دے طریقے اُتے وی سوال نہیں چُکیا۔ میں ہولی، دیولی تے ہور سارے تہوار ای ایسے گھر وچ منائے تے ایہناں ساریاں نے نہ صرف میری مدد کیتی بلکہ مینوں بہت پیار وی کیتا۔ سوشل میڈیا اُتے ایہ خبر ساہمنے آن اُتے ورتیندڑاں نے انسانیت دی اک انوکھی مثال قائم کرن اُتے مسلمان خاندان نوں سلاہیا۔
