عدن(پاکستان پوائنٹ نیوز05۔ستمبر2016ء) یمن وچ ہون والے ڈرون حملے وچ القاعدہ دے 7 مشتبہ جنگجو ہلاک ہو گئے، ممکنا طور اُتے ایہ ڈرون حملا امریکا ولوں کیتا گیا۔ عرب نشریاتی ادارے دے مطابق اک سکیورٹی عہدے دار نے دسیا کہ یمن دے صوبے مارب دے علاقے ال وادی وچ اک اپارٹمنٹ اُتے امریکی ڈرون طیارے نے میزائل سُٹے جہدے نتیجے وچ 7 بندے ہلاک ہو گئے۔ یاد رہوے کہ امریکا گھٹ ای یمن وچ ڈرون حملیاں دا اعتراف کردا اے پر اوہ یمن وچ سرگرم القاعدہ دی شاخ جزیرہ نما عرب وچ القاعدہ خلاف کارروائیاں کردا رہیا اے۔
یمن وچ حکومت تے حوثی باغیاں وچکار جاری لڑائی پاروں داعش تے القاعدہ نوں اوتھے اپنیاں جڑاں پکیاں کرن وچ مدد ملی اے۔ دوجے پاسے اقوام متحدہ دے مطابق مارچ 2015 توں ہُن تیکر یمن وچ جاری جھیڑے وچ 6 ہزار توں ودھ بندے ہلاک تے ہزاراں دی گنتی وچ زخمی ہو ئے نیں۔
