بینگ ژو(پاکستان پوائنٹ نیوز05۔ستمبر2016ء) شام دے جھیڑے دا حل کڈھن لئی امریکا تے روس وچکار ہون والے مذاکرات بغیر نتیجے دے ختم ہو گئے۔ امریکی محکما خارجا دے سینئر عہدے دار دا کہنا اے کہ شام دے مسئلے اُتے امریکا تے روس وچکار اختلافات برقرار نیں تے بینگ ژو وچ امریکی وزیر خارجا جان کیری تے روسی وزیر خارجا سرگئی لارووف وچکار مذاکرات بغیر کسے سمجھوتے دے ختم ہو گئے۔
مذاکرات توں پہلے ایس گل دا امکان ظاہر کیتا جا رہیا سی کہ شام دے صوبے حلب وچ پھسے شہریاں تیکر امداد دی فراہمی لئی روسی تے شامی بمباریاں نوں جزوی طور اُتے روکن اُتے اتفاق ہو جائے گا پر انج نہیں ہویا۔ فرانسیسی ادارے دے مطابق امریکی حکام نے روس اُتے الزام لایا کہ اوہ پہلے توں طے شدا معاملات توں وی پِچھے ہٹ رہیا اے تے امریکا نے ایہناں معاملیاں اُتے نظرثانی توں انکار کر دِتا اے۔ یاد رہوے کہ شام وچ پچھلے 5 ورھیاں توں جاری خانا جنگی وچ تن لکھ دے نیڑے بندے ہلاک تے لکھاں دی گنتی وچ بے گھر ہو گئے نیں تے شامی فوج نے حلب دے اوہناں علاقیاں نوں گھیرے وچ لیا ہویا اے جِتھے باغیاں دا قبضہ اے۔
