استنبول(پاکستان پوائنٹ نیوز13۔دسمبر2017ء) او آئی سی اعلامیے وچ امریکا توں مقبوضہ بیت المقدس نوں اسرائیل دا دارالحکومت منن دا فیصلا واپس لین دا مطالبہ کیتا گیا اے۔ تفصیل مطابق ترکی دے شہر استنبول وچ ہون والا او آئی سی اجلاس ختم ہو گیا اے۔ اجلاس دے اعلامیے وچ آکھیا گیا اے کہ امریکی صدر دے القدس بارے فیصلے دے خطرناک نتیجے ساہمنے آن گے۔ امریکا چھیتی بیت المقدس نوں اسرائیل دا دارالحکومت منن دا فیصلا واپس لوے، جے اِنج نہ ہویا تے خطرناک نتیجیاں دا امریکا آپے ای ذمے وار ہوئے گا۔
اجلاس دے آخیر اُتے خطاب کردے ہوئے ترک صدر نے آکھیا کہ اسلامی تعاون تنظیم بیت المقدس دے تحفظ لئی بنی سی۔ مشرق وسطی وچ امن مذاکرات لئی امریکا دی تھاں نویں طاقت نوں لبھنا پئے گا۔ امریکا مشرق وسطی وچ امن دے قیام وچ بری طرحاں ناکام رہیا۔ ہن عرب و اسلامی حکومتاں نوں فلسطین بارے سنجیدہ موقف اپنانا پئے گا۔
