دِلی(پاکستان پوائنٹ نیوز11۔دسمبر2017ء) دِلی دی اک 33ورھیاں دی سوانی نوں غیر قانونی شراب خلاف کارروائی وچ سوانی پولیس کمشنر دی مدد کرنا مہنگا پے گیا اے۔ تفصیل مطا بق پولیس دی مد دکرن اُتے 33ورھیاں دی سوانی نوں تشدد دا نشانہ بنایا گیا۔ ایہو نہیں بلکہ ایس سوانی دے کپڑے پاڑ ن مگروں اوہنوں ننگا کر کے گلیاں وچ ٹُرن لئی مجبور کیتا گیا۔ ذکر کیتی گئی سوانی دِلی پولیس دی سوانی کمشنر لئی رضاکارانہ طور اُتے کم کردی سی۔
ایس سوانی نے نیرالا وچ بدھ دے دیہاڑے غیر قانونی شراب پھرن وچ پولیس دی مد دکیتی۔ 33ورھیاں دی پروین آپ وی غیر قانونی شراب خلاف اے جدکہ اپنے علاقے وچ وی غیر قانونی شراب دے خلاف احتجاج کردی رہی اے۔ پروین نے نیرالا وچ موجود اک گھر وچوں کئی بوتلاں غیر قانونی شراب برآمد کرن وچ پولیس دی مدد کیتی۔ پروین چار بالاں دی ماں اے۔ پولیس نوں بیان دیندے ہوئے پروین نے آکھیا کہ اوہدے اُتے حملا سوانیاں اُتے مشتمل اک جتھے نے کیتا جو مبینہ طور اُتے غیر قانونی شراب دے کاروبار وچ ملو ث اے۔
پروین نوں ڈاکٹری امداد لئی سرکاری ہسپتال منتقل کر دتا گیا اے، پولیس نے ایس معاملے نوں سنجیدگی نال لیندے ہوئے ملزماں خلاف کارروائی شروع کر دتی اے۔ دوجے پاسے وزیر اعلا اروند کیجروال نے واقعے دی مذمت کردے ہوئے واقعے نوں شرمناک قرار دتا اے۔
