ریاض(پاکستان پوائنٹ نیوز22۔نومبر2017ء) اسرائیلی شہری ولوں سعودی عرب دے شہر مدینہ دی مسجد نبویﷺ وچ بنائی گئی تصویر دنیا بھر دے مسلماناں لئی سوشل میڈیا اُتے غصے دا کارن بن گئی۔ روس وچ پیدا ہون والے 31ورھیاں دے اسرائیلی شہری بین تسیون نے اپنے ایران، لبنان، سعودی عرب تے اردن دے دورے دیاں تصویراں سوشل میڈیا اُتے پوسٹ کیتیاں نیں۔ اوہدے فیس بک دے صفحے اُتے پوسٹ کیتیاں گئیاں تصویراں وچ اوہنوں مسلماناں دے مقدس شہر مدینہ دی مسجد نبوی وچ ویکھیا جا سکد ااے۔
تسیون نے فیس بک اُتے پوسٹ کیتی جان والی اپنی اک تصویر بارے آکھیا کہ سعودی عرب دے لوک یہودی قوم نال کھلوتے رہن گے۔ اک تصویر وچ تسیون نوں سعودی عرب دا روایتی لباس پائے ویکھیا گیا اے۔ اوہنے ایس توں وکھ اک ہور تصویر پوسٹ کیتی جہدے بارے اوہدا کہنا سی کہ مشرق وسطی وچ امن اک دوجے لئی محبت تے عزت نال اے۔یاد رہوے کہ غیر مسلماناں نوں مکہ دا دورہ کرن توں منع کیتا جان دا اے تے اوہناں نوں مشورہ دتا جاندا اے کہ اوہ مدینہ دے مین حصے وچ نہ جان، جتھے مسجد نبویﷺ اے۔تسیون نے اخبار ٹائمز آف اسرائیل نال گل بات کردے ہوئے آکھیا کہ مسلمان ملکاں دا دورہ کرنا اوہدا شوق اے۔
