نویں دِلی(پاکستان پوائنٹ نیوز06۔نومبر2017ء) بھارت وچ بلیو وہیل گیم دے 27ویں مرحلے دا ٹاسک پورا کرن لئی نوجوان گھروں فرار ہو گیا۔ تفصیل مطابق بلیو وہیل نامی آن لائن گیم پچھلے کُجھ مہینیاں توں پوری دنیا دے نوجواناں نوں متاثر کر رہی اے۔ ایہ گیم ہن تیکر اپنے خطرناک ٹاسک تے چیلنجاں دی وجہ توں سینکڑیاں لوکاں دی موت دا کارن بن گئی اے۔ ایس گیم دا تازہ شکاربھارت توں رکھن والا 16ورھیاں دا راہول بنیا۔
راہول نوں ٹاسک دتا گیا کہ اوہ آن لائن گیم دے 27مرحلے نوں پار کرن لئی بمبئی جا کے کوئی تیز جاندی ریل گڈی دی چھت اُتے دوڑ لائے۔ راہول ایس ٹاسک نوں پورا کرن لئی گھروں غائب ہو گیا۔رہوال دے گواچ جان دی رپورٹ اوہدے گھر والیاں نے مقامی پولیس سٹیشن وچ درج کروائی۔پولیس نے جدوں راہول دے موبائل فون نوں ٹریس کیتا تے اوہ بمبئی جا رہیا سی۔ خش قسمتی نال راہول دے ٹاسک پورا کرن توں پہلے پولیس نے اوہنوں اپنے قبضے وچ لیندے ہوئے اوہنوں ماں پیو تیکر اپڑایادتا۔
راہول نے پولیس نوں دسیا کہ اوہنوں بلیو وہیل گیم دا ٹاسک پورا کرن لئی گھر چھڈ کے بمبئی جانا پیا ۔ راہول دا کہنا سی کہ میرا ٹاسک سی کہ میں چلدی ریل گڈی اُتے دوڑ لاواں۔پر اوس توں پہلاں ای مینوں پولیس نے اپنے قبضے وچ لے لیا۔
